NM-gull til Øystein Sylta

? Alt klaffa, og det vart eit perfekt løp frå start til mål for min del, seier ein andpusten Øystein Sylta etter å ha lagt bak seg tre kilometer i det kuperte terrenget på Storetveit.
Han fortel at taktikken var å hengja med framme i feltet fram til 1000 meter, for så å klina til og mørna dei andre skikkeleg mot slutten. I følgje Vidar-løparen er nemleg det optimale for han å ha eit forsprang på konkurrentane dei siste hundre metrane inn mot mål.
? Det lukkast eg med i dag, og det kjennest utruleg godt, fastslår den stolte noregsmeisteren.

Satsar mot EM
Sylta som var favoritt før løpet laurdag, fortel at han har jobba hardt denne vinteren for å koma på det nivået han er på no. I gjennomsnitt har sprunge 180 kilometer i veka denne sesongen.
? Eg har auka treningsmengda åtskilleg frå tidlegare sesongar. Men det er heilt naudsynt å trena så mykje om ein skal vera med heilt i toppen, seier Sylta.  
Og det har noregsmeisteren absolutt planar om. Det neste store målet for Sylta no er nemleg å kvalifisera seg til 3000 meter hinder i komande EM. Sjølv har han god tru på at han kjem til å klara det før kvalifiseringsfristen går ut i august i år.
? Eg satsar på det. Løpet her i dag viser at forma er inntakt, så det ser i alle fall lovande ut, seier Sylta optimistisk.

Fire frå AKS
Også fleire deltakarar frå Nordhordland deltok i NM i terrengløp i helga. AKS-77 stilte med både unggutane Bjørn Inge Håland Dyrkolbotn og Emil Andre Erstad, samt veteranane Olai Nepstad og Gunnar Gaulen. Sjølv om dei ikkje hevda seg heilt i toppen, var løparane frå AKS godt nøgde med innsatsen.
? Me gjorde så godt me kunne. Uansett plassering er det kjekt å ha vore med. Arrangementet har totalt sett vore heilt topp med flotte løyper og god stemning. All honnør til arrangørane, oppsummerer veteranløpar Olai Nepstad.