Nøgd etter møte med Telenor-sjefar

– Eg tykte det var eit positivt møte, og eg håpar det skal verta ein vinn-vinn-situasjon både for kommunen sine innbyggjarar og Telenor, seier ordførar Knut Moe til Strilen like etter møtet.

Torsdag var dekningsdirektør Bjørn Amundsen og programdirektør for modernisering og forenkling, Arne Quist Christensen, frå Telenor i Modalen. Der møtte dei ordførar Knut Moe, rådmann Øivind Olsnes og ein representant for BKK for å diskutera planen om å fasa ut fasttelefonane i kommunen.

BKK var med fordi det er dei som fører tilsyn med fibernettet i kommunen.

Like godt
– Me har fått forsikringar frå Telenor om at ingen abonnentar skal få eit dårlegare tilbod enn no når det gjeld telefoni etter ei eventuell omlegging, seier Moe.

Tvert om håpar han at til­bodet skal verta betre, for i dag er det til dels store veikskapar med mobilnettet i kommunen. En­kel­te stader er det ikkje dekning, og til tider dett mobil­nettet ut i heile kommunen. Det skjedde både i pinsehelga og førre veke, og det viser og at backup-løysingane heller ikkje er gode nok, seier Moe.

– Driftstryggleiken er veldig viktig for oss, uansett kva løysing som vert vald. Og me har kravstore innbyggjarar som forventar gode løysingar både når det gjeld mobil og nett.

Orienterte
– Møtet i dag var som eit informasjonsmøte, der Telenor la fram sine planar og me fortalde om problema rundt mobildekninga i kommunen, seier Moe.

Han trur nok at Telenor vart litt overraska over kor store problema er, og at investeringane ein må gjera før ein eventuelt kan stengja fasttelefonnettet og fjerna kopartrådane, er større enn dei hadde rekna med.

Pilotkommune
Det er ikkje berre i Modalen at Telenor planlegg å fasa ut fast­telefonane. Det vil truleg skje i heile landet, men dei vurderer å bruka Modalen som eit pilot­prosjekt for å finna ut korleis dette kan gjerast.

– Dei sa i møtet at dei i løpet av tredje kvartal vil bestemma om Modalen skal vera pilotkommune eller ikkje. Viss dei bestemmer seg for det, vil utfasinga starta neste år, avsluttar Moe.

Konstruktivt
– Eg tykkjer møtet i Modalen var veldig konstruktivt, seier dekningsdirektør Bjørn Amundsen til Strilen.

Han stadfestar at dei vil ta stilling til om Modalen skal vera pilotkommunen innan utgangen av tredje kvartal.

– Der dukkar alltid opp utfordringar, og me må mellom anna rekna på investeringar i samband med tunnelar og naud­telefoni, seier Amundsen.