Ny barnehage på Bruvoll

Skodvin-krinsen har ikkje noko barnehagetilbod etter at korttidsbarnehagen i Kløvertun helsehus vart lagd ned for nokre år sidan. Men no kan krinsen få eit nytt tilbod alt frå hausten, og då i same lokale som sist.
? Me er fire kvinner som alle har småborn, som har sendt ut eit spørjeskjema til alle med born i aktuell alder i krinsen. Responsen har vore svært godt, og alt no veit me at der er grunnlag for å starta ein barnehage med ei avdeling, seier Charlotte Nordahl til Strilen.
Ho har sjølv to born i aktuell alder og er utdanna førskulelærar.

Kløvertun
? Me har vore i kontakt med Hundvindgrend sanitetsforening, som eig Kløvertun. Dei er interesserte i å leiga ut til oss, seier Nordahl.
Men dei tek sikte på å oppretta ein såkalla utebarnehage. Difor håpar dei å opparbeida eit leirområde med lavvo like ved, der borna skal vera mykje av dagen.
? Eg jobbar sjølv i ein utebarnehage på Seim, og eg ser kor godt det fungerer. Borna held seg friskare, og det vert færre konfliktar, seier Nordahl.
I Kløvertun må det byggjast eit påbygg med lager for møblane som er der i dag. I tillegg må det innreiast ein grovgarderobe som barnehagen skal bruka.

Viktig for bygda
? I tillegg til at me ønskjer barnehage for våre eigne born, meiner me det er viktig med ein barnehage i bygda, særleg for at barnefamiliar skal slå seg til her, seier Charlotte Nordahl.
Førebels er barnehagen berre på planleggingsstadiet, men målsetjinga er å koma i gang alt frå hausten.
Barnehagen vil vera open for born frå eitt til seks år. I utgangspunktet vil han ha 18 plassar, men ein god del av dei aktuelle borna er under tre år. Dei tel for to plassar.
? Kløvertun ligg sentralt i bygda. I Skodvin-krinsen er det mange små bygder, og det er viktig at borna vert kjende med kvarandre før dei begynnar i skulen, seier Nordahl som endå ein grunn for å oppretta eit barnehagetilbod.