Ny ferje mellom Leirvåg og Sløvåg

? Me er sjølvsagt glade for dette, men skulle ha ønskt at den nye ferja kom tidlegare, seier Gulen-ordførar Trude Brosvik. Kommunen har lenge arbeidd med å få ny ferje på dette sambandet. Mellom anna er dette viktig for næringslivet i kommunen.

Truleg frå nyttår
Det er snakk om å flytta ferja MF «Etne» frå sambandet Bruravik - Brimnes til Fensfjorden, når dei nye gassferjene kjem. Desse gassferjene må på plass før «Etne» kan flyttast, slik at det ikkje er heilt sikkert at ferja er på plass i Fensfjorden frå nyttår.
MF «Etne» har 50 prosent større kapasitet enn MF «Eidfjord» som trafikkerer Fensfjorden i dag. «Etne» tek 94 personbilar og 500 passasjerar, mot 75 personbilar og 260 passasjerar på «Eidfjord». I tillegg vil den nye ferja ha markert høgare kapasitet for vogntog.

Bygt i 1979
I brevet til Gulen kommunen skriv HSD at MF «Etne» representerer den største ferjetypen som  kan trafikkera dette sambandet i dag. Dette på grunn av at kaien i Skipavik har sine avgrensingar.
? Dette problemet vert likevel løyst når Byrknesøy vert landfast, skriv HSD i brevet.
Dei skriv og at dei vil vurdera kva tiltak som kan setjast i verk for å tilpassa fartyet betre for funksjonshemma.
Sjølv om «nyeferja» er større enn «Eidfjord», er det ikkje snakk om nokon ungdom. MF «Etne» vart levert av Mjellem & Karlsen i 1979 («Eidfjord» 1975), og trafikkerte først sambandet mellom Askøy og Bergen under namnet MF «Askøy».
Namnet «Etne» fekk ferja i 1988, ifølgje nettstaden Wikipedia.