Ny koalisjon sikrar Skodvin skule

– Når me seier noko konkret berre om Skodvin, er det avdi økonomiplanen er bindande for 2012, men berre retningsgjevande for dei neste åra. Og det var frå hausten 2012 at Skodvin skulle leggjast ned, men der me tek inn midlar for vidare drift, påpeikar Leif Hosøy Sleire (H) etter møtet.

Festo ventar
For Festo skule kuttar rådmannen i sitt framlegg løyvinga frå 2013 når ny Seim skule etter planen skal innflyttast. Rådmannen går dermed ut frå overflytting av Festo-elevane frå hausten 2013.

– Me i fleirtalet seier ikkje noko om Festo, avdi me der ikkje har landa ei endeleg løysing, seier Sleire.
For Kløvheim skule viser han til at rådmannen har med pengar til vidare drift til og med 2015, ut heile økonomiplanperioden.

Ny koalisjon
Det er som venta koalisjonen KrF/Høgre/Sp/Venstre som legg inn midlar til vidare kommunal drift av Skodvin skule. Der har bygda førebudd seg på å starta privat Montessorriskule.

– Det er ikkje overraskande at fleirtalet set full revers på grendaskulane og tek innatt midlar til vidare drift av Skodvin skule. Men eg reknar med at Festo skule vert lagt ned, sa Sveinung Valle (Ap) etter avklaringa i formannskapet torsdag.

– Slutt på semja
Som Valle og uttrykte det, er det «slutt på den rørande budsjett-semja» som alle partia har stått bak tidlegare. I år kjem både Ap og Frp med eigne framlegg. Begge partia har stått fast på vedtaket for skulenedlegging frå 2010, som fleire andre parti tok omkamp på.

Både Ap og Frp kjem med eigne forslag når økonomiplanen kjem opp på det såkalla budsjettmøtet i Strilatun i desember.

Eikanger-paviljong
Elles går fleirtalet inn for at Eikanger skule skal få ein paviljong, som skal stå ferdig til skulestart i 2013.
Lindås barneskule vil fleirtalet utbetra og gje trafikksikring for 15-20 millionar.

For Seim skule vil fleirtalet ha ei sak om å forskottera 4 millionar kroner til infrastruktur/gangveg. Det vert og bede om ein plan med kostnadsoverslag for vidare opprusting av Alversund skule.

På driftssida finn koalisjonen plass for å vidareføra den felles interkommunale jordmorvakta, eit tilbod som rådmannen ville kutta.