Ny musikal på Kaland

Kaland-elevane skal framføra Rome og Julie av William Shakespeare i musikal-versjon fredag kveld. Det er lærar Therese Aakre som har tilpassa det vidgjetne teaterstykket til musikalversjon.
Strilen var innom Kaland skule måndag, og då var elevane i full gang med å øva på stykket. Heile veka går med til dette arbeidet, men dei starta så smått i musikktimane i haust, fortel PR-ansvarleg Mathias Gallefoss (8. klasse).
Han synest det er kjekt å arbeida med dette, og meiner dei aller fleste andre elevane synest det også. Nokre av elevane er skodespelarar, nokre arbeider med lyd og lys, nokre med kulisser og kostymer og andre med PR. Det er mykje som skal gjerast i samband med ei musikaloppsetjing.
For to år sidan sette dei opp musikalen Grease på Kaland skule. Det vart ein stor suksess, med trakkande fullt hus. Fredag vert det altså ein ny sjanse for dei som ikkje fekk med seg førre musikal.
Etter det Strilen fekk med seg på øvinga måndag, vert det brukt moderne musikk. Blant dei to musikkinnslaga me fekk med oss var Whitney Houston sin «I will always love you» og Lionel Richie sin «Hello». Her får ein altså sjå ei gammal kjærleikshistorie i moderne innpakking.