Ny pers for Emil André Erstad

? Dette var utruleg gøy, for eg har slite litt den siste månaden. Har hatt jernmangel, og i det meste av juni vart det lite trening, seier Emil André Erstad til Strilen.
800 meter-løpet gjekk fredag 29. juni. Henrik Ingebrigtsen frå Sandnes vann klassen  med 1.54.26, medan Erstad vart nummer to med 1.55.18.
? Det er ny pers for meg. Den gamle var på 1.57.86, og den sette eg i same stemne i 2006, seier han.
Det gjekk raskt ut frå start på 800 meteren i Gøteborg, og halvvegs var Erstad på ein 6/7-plass. Men på dei siste 200 var ingen raskare enn radværingen, og han tok til slutt andreplassen.
? Eg har fjerde beste juniortid på 800 meter så langt i år, så no satsar eg på medalje under junior-NM i Tønsberg i august, seier Erstad.
800 meter er den einaste distansen han skal vera med på under junior-NM. I Världsungdomsspelen var han også med på 3000 meter, der vart det ein 8. plass med tida 9.09.77.
? Dette var det første 3000 meter-løpet eg har vore med på, så eg visste ikkje heilt korleis eg skulle disponera løpet. Eg skal under ni minutt på distansen denne sesongen, og målet er medalje under UM, seier han.
Måndag var Erstad på plass i sveitsiske St. Moritz, der han i tre veker skal vera på treningsleir saman med ein del andre utøvarar frå AKS-77.
? Eg hadde første økt tysdag, og merka godt høgda. Skal trena roleg i starten, og auka på når eg har akklimatisert meg, seier radværingen, som er på høgdetrening for første gong.
Når han etter tre veker kjem att frå Sveits skal han før junior-NM prøva seg på kravet på 800 meter under senior-NM. Skal Erstad få stilla der må han under 1.55.00, og med nye persen frå helga er han under to tidelar unna.
Junior-NM går i Tønsberg 3. til 5. august. Senior-NM går i Askim 10. til 12. august.