Ny Sæbø skule

? Dette vert den beste løysinga for både lærarar, elevar og bygdefolket, sa Bjørg Skarbø (Sp), som gav honnør til plannemnda for arbeidet dei har gjort.
Skarbø peika også på at det vil vera svært viktig at ein no får eit større forsamlingslokale i bygda, ved at ein vel å gå inn for løysinga med volleyballhallen.

? Endeleg
? Endeleg. Ein treng sårt ein ny skule inne på Sæbø. Eg håpar dette også medverkar til å få innbyggjartalet opp i kommunen, sa Bjørg Murberg (V).
Murberg trekte også fram som svært positivt at Sæbø barnehage vil få disponera heile nybygget der barnehagen held til. No disponerer skulen 2. etasje.

Ny plannemnd
I tillegg til å gå for løysinga med eit nybygg med volleyballhall, vedtok kommunestyret at det skal setjast ned ei plannemnd på fem personar som skal arbeida med konkrete utbyggingsplanar. Frå formannskapet vart John Bauge og Vigdis Villanger (Sp) vald. Liv Berit Rath føreslo at også rådet for funksjonshemma måtte vera representert i nemnda, og dette vart vedteke.

Energiløysing
Elles skal nemnda ha medlemmer frå foreldra og elevane, og dei tilsette skal og ha ein representant.
Formannskapet hadde i si behandling tidlegare peika på at ein må syta for nok lagerkapasitet for skulen og skulemusikklaget. Dei bad også nemnda drøfta nøye kva energiløysing ein skal velja for bygget.

Forsamlingslokale
Utfordringa for kommunen vert å laga eit opplegg for finansiering av bygget. Dette vert eit stort løft for Radøy kommune, skriv rådmannen i utgreiinga til møtet. Skulebygget er kostnadsrekna til 52,5 millionar kroner. Men på grunn av at ein byggjer ein volleyballhall i staden for ein gymsal, vil dette løysa ut fire millionar kroner i tippemidlar. Det vil ikkje berre gjera at skulen får betre kroppsøvingslokale, og at idretten får betre tilhøve, men også at Sæbø vil få ein langt større forsamlingslokale enn det tidlegare bygget.
Noverande gymsal er på 230 kvadratmeter, medan den planlagde volleyballhallen er på 388 kvadratmeter.