Ny skule, men færre elevar

Elevprognosane for Sæbø skule viser at talet på førsteklassingar vil minka kraftig dei næraste åra. Til hausten vert det tretti førsteklassingar, i 2007 vert det 17, i 2008 20 og i 2009 15 førsteklassingar.
Tala for Sæbø skule kan også verta påverka av at foreldre som bur i utkanten av krinsen, vel å senda borna sine til skule på Manger.

Tilflytting
Kommunen har planane klare om eit byggjefelt på oversida av vegen forbi Austmarka og skulen, eit felt som kan gje fleire elevar til Sæbø skule. Så langt har kostnaden til avkøyring frå riksvegen stoppa dette feltet. Det føreligg også andre planar om bustadtomter i krinsen, slik at husbygging kan få elevtalet opp.
? Frå hausten av vil Sæbø skule ha 150-160 elevar, eit tal som vil gå nedover om nokre år, seier Helge Vallestad i Radøy kommune. For åtte år sidan hadde skulen 113 elevar.

Usikre prognosar
Vallestad legg til at elevtala kan endra seg, og endringane gjerne vert større dess lengre fram ein ser.
? For fire-fem år sidan sa prognosane at Radøy totalt sett ville ha kring 620 elevar i grunnskulen. Men me har har hatt kring 665 elevar i fleire år no, seier Vallestad.
Prognosen for det komande elevtalet i Radøy-skulane kan også påverkast av flytting, om
familiar utan små born i skule-alder sel husværa sine til familiar med små born.