Nytt knuseverk på trappene

Halsvik Aggregates, som eig og driv steinuttaket i Sløvåg, hadde eit driftsresultat på 35 millionar kroner i 2006. Dette er vel sju millionar kroner meir enn i 2005.
Driftsresultatet gjekk opp trass i at omsetnaden gjekk litt ned, frå 172,7 millionar kroner i 2005 til 156,5 millionar. Årsaka er først og fremst at andre kostnader gjekk ned.
Av eit årsresultat på 25,7 millionar kroner er ti millionar sett av til utbytte.
Halsvik Aggregates AS er eigd 50 prosent av Halsvik Industries Pls i England og 50 prosent av Wergeland Holding AS.

Snøkvit
I tillegg til steinknuseverket i Sløvåg eig og driv Halsvik Aggregates eit steinknuseverk i Kvalsund kommune i Finnmark. Frå dette knuseveket vert det levert stein og grus til tildekking av røyrleidningen frå Snøkvit-feltet utanfor Vest-Finnmark.
? Dette arbeidet vert avslutta i løpet av inneverande år, så utsiktene for 2007 er litt usikre, seier dagleg leiar Lars Hellandsjø til Strilen.
Resultatet for 2006 sett i høve til omsetnad er svært god. Resultatgraden er 16,4 prosent.
Rekneskapstala for 2006 for dei andre verksemdene som Wergeland Halsvik AS driv i Sløvåg, er førebels ikkje klare.

Nytt knuseverk
Halsvik Aggregates satsar vidare i Sløvåg. Eit nytt knuseverk skal etter planen vera i drift i løpet av 2010.
? Det nye knuseverket skal både ha større kapasitet og vera meir effektivt enn noverande maskineri, seier innehavar Hans H. Wergeland til Strilen.
Ein god del pengar vil det nok og kosta, men summar vil han ikkje gå nærare inn på. Men med ein eigenkapital på 66,3 millionar kroner skulle det vera rom for litt investeringar.