Offentleg byggjeboom til 300 millionar

Går alt etter planen, vil Statoil Mongstad i løpet av ein månad markera første spadestikk på gasskraftverket som skal vera i drift i 2010. På førehand er prislappen stipulert til fire milliardar kroner.
Den lokale byggjebransjen tek sjølvsagt sikte på å sikra seg ein bra bit av denne kaka, til dømes som underleverandørar til større selskap.
Men lokale firma innan bygg og anlegg kan også sjå fram til heftig utbygging i offentleg regi både i Knarvik og på Radøy. Skular, barnehagar og andre prosjekt står i kø i 2007 og 2008.
Ei summering Strilen har gjort, viser at det etter alt å døma vert snakk om 300 millionar kroner om ein tek med prosjekt som vert sluttførte i 2009.

Hett i Knarvik
Det er først og fremst i Knarvik det vert ei heftig utbygging av offentlege bygg i tillegg til bustadbygginga.
Knarvik vidaregåande skule, med bygningar frå midt på 1960-talet, kan omsider sjå fram til eit etterlengta tilbygg på tidlegare Lindås Gymnas. Fasadeteikningar er klare og skulen håpar på byggjestart til sommaren. Elevtalet på denne avdelinga på Juvikstølen vil auka frå 300 til 600.
Dette er trinn 1 av utbygginga av skulen. Når fylket gjev grønt lys for trinn 2, vert det dobbelt så stort, kring 7000 rutemeter.

Kommunen i startgropa
For Lindås kommune står også prosjekta i kø i Knarvik.
? I slutten av januar vil me avklara kven av to inviterte firma som får oppdraget med Juvikstølen barnehage. Me tar sikte på byggjestart i mars, seier prosjektleiar Terje Fauske.
Kommunestyret har sett ei ramme på 30 millionar for ein barnehage med plass til 135 born. Fauske reknar med at ramme skal haldast, sjølv om høg aktivitet pressar prisane.
? Utvidinga av Knarvik ungdomsskule kan tidlegast påbyrjast i slutten av 2007, mest truleg tidleg i 2008, seier Fauske. I tillegg planlegg ein utbygging av Leiknes skule og opprusting av Ostereidet ungdomsskule. Ramma politikarane har sett for dei tre prosjekta, er 69 millionar kroner.
? Me er også rett rundt hjørnet med å koma i gang med kunstgrasbana som Trond Mohn spanderer. Kostnaden ser ut til å koma opp mot ti millionar. I Knarvik vert det snart også bygd sambindingsveg frå baneområdet til E39 i Gjervik, opplyser Fauske.
Elles er nye psykriatribustader på Lindås blant dei større prosjekta, med ein prislapp på 14 millionar. Dei skal så ferdige neste år.

Ny Sæbø skule
Ny skule er også på trappene i Austmarka på Radøy.
? Forprosjektet skal avsluttast i februar/mars. Går alt på skinner kan det så smått verta oppstart i slutten av 2007, men mest truleg tidleg neste år, seier rektor Rolf Sandstad.
Også dette er blant dei større lokale skuleprosjekta som skal ut på anbod.  Golvflata er vel 2600 rutemeter inkludert volleyballhall. Per i dag håpar Radøy å koma i hamn med 52,5 millionar kroner, rekna etter 20.000 kroner per kvadratmeter.
? Stor byggjeaktivitet kan pressa prisane, men entreprenørane bør vel også tenkja litt på at det er viktig å ha oppdrag på litt sikt, seier Rolf Sandstad.