OL-deltakar med strilerøter

? Det stemmer nok at Even Wetten har slektsrøter her. Morfar hans var bror til far min, kan Anna K. Valle fortelja.
Ho er no busett på Spjotøy og driv garden der no saman med mannen.
Even Wetten representerer Hamar IL og skal delta i OL i Torino. Han har i år vore den beste, norske 1000-meterløparen og vart nyleg nummer fem i verdscupen, berre eit halvt sekund etter vinnaren.
I fjor kom toppen på karrieren. Då vart han verdsmeister på 1000-meter i Inzell i Tyskland, ganske uventa. Den personlege rekorden han har på 1000 meter vart sett i Salt Lake City i november i fjor. Den er på 1.08.76.

Spennande
? Det er klart det er litt ekstra spennande når det er nokon i slekta som deltek, seier Anna K. Valle.
Even Wetten har sjølv vore på Spjotøy, men det er nokre år sidan.
? Men me har jamleg kontakt med familien i ulike slektssamanhengar, seier Valle.

I Forsvaret
Morfar til Even brukte etternamnet Gabrielsen. Han var i Forsvaret og tenestegjorde ulike stader. Men til slutt kjøpte han seg gard utanfor Hamar, der mor til Even har vakse opp.
? Even kjem nok frå ein sportsinteressert familie, men eg kjenner ikkje til at andre har drive idrett på det planet som han gjer, seier Anna K. Valle.
Even Wetten skal elles ha endå meir vestlandsblod i årane, sidan mormora kom frå Bømlo i Sunnhordland.