Olav Nygards grav redda i siste liten

Lyrikaren Olav Nygard (1884-1924) er truleg den mest kjende personen som kjem frå Modalen. Han er rekna som ein av dei store innan norsk lyrikk. Han budde dei siste åra av livet sitt på Oppsal i Oslo og vart gravlagd på Østre Aker gravlund. Men der har grava forfalle dei seinare åra, og i sommar oppdaga ei dame at det hang lapp på grava om at viss ikkje festeavgifta vart betalt innan utgangen av november, ville grava verta sletta.

Tipsa Dag og Tid
Dama som oppdaga lappen, tipsa nynorskavisa Dag og Tid om det som var i ferd med å skje. Der greip tidlegare Strilen-journalist Ottar Fyllingsnes tak i saka. Han ringde ordførar Knut Moe i Modalen og gjorde han merksam på at festeavgifta ikkje var betalt. Dette har avisa eit oppslag om i siste nummer.

Mistyding
? Me hadde saka oppe i kommunen i 2002 og vedtok då at kommunen skulle betala festeavgift for grava. Men her har det nok vore kommunikasjonssvikt, slik at dette vedtaket ikkje vart følgd opp, seier Knut Moe til Strilen.
No er det ordna opp i dette, slik at grava ikkje vert sletta.
Men grava er og ustelt, og gravsteinen er tilgrodd, slik at inskripsjonen er vanskeleg å lesa.
Moe meiner at ein også må finna ei løysing på dette, og han har bede kulturkontoret sjå på saka.
? Det finst ei veneforeining for Olav Nygard. Kanskje kan dei ta på seg å stella grava, seier Moe.
Han tykkjer absolutt det er viktig at grava til den vidgjetne modalingen vert halden i stand.