Oljeutslepp på Flatøy

Ulukka skjedde ved eittida då ein lastebil frå BKK køyrde feil i rundkøyringa på Flatøy. Bilen var på veg frå Meland og skulle eigentleg til Matre i Mafjorden, men hamna på Flatøy i staden. Då sjåføren skjøna at han hadde køyrt feil, skulle han snu lastebilen. I samband med dette velta tanken med trafoolje ned av lasteplanet på bilen og ut i vegen. I samanstøyten med bakken sprang tanken lekk og olja rann ut. Olje følgde vegen ned i undergangen under E 39 på Flatøy. Der ligg der ein oppsamlingskum, og frå den går vatnet i sjøen.

Samla opp
Folk frå Lindås og Meland brannvern vart tilkalla, og dei strødde eit spesielt sagmjøl på vegen som skal trekkja til seg olje, men ikkje vatn. Etterpå vart sagmjølet kosta opp og fjerna.
Men ein del olje nådde sjøen, for tilsette hos Frank Mohn Flatøy AS oppdaga at det hadde kome olje på sjøen.

Ikkje giftig
Frå sjåføren på lastebilen vart det sagt at olja som lek ut, skal vera vanleg mineralolje, og dermed ikkje særleg skadeleg for miljøet. Men då Strilen var på staden, dreiv skadestadsleier Nils Medaas og undersøkte om olja er ufarleg.
Brannvernet hadde fleire bilar og ganske mange personar på staden. Det vart og lagt ut lense som skulle hindra at olje nådde kummen, og dermed kom ut i sjøen.