Omkjøring på «kjerreveg»

Det er ei oppleving i seg sjølv å kjøra om Kleivdal, nærast ei reise tilbake i tida. Det heile startar fantastisk bra, med europaveg heilt til du tek av i Hillesvågen. Deretter tek du to kjappe til venstre, og du er på rett veg. Du har ikkje køyrd feil, sjølv om du manøvrerer deg oppover bakken gjennom eit byggefelt med 30-sone. Etter at du har passa på å ikkje fortsetja rett fram til Sætre, må du sakka farten til godt under 30. Her kjem nemleg ein høgresving av dimensjonar og totalt utan sikt. Og her startar eventyret med smal, kommunal veg, og utan lys og møteplassar verdt å nemna. Verdt å nemna er derimot alle dei uforutsigbare svingane. Turen er ei berg-  og dalbanereise, men ikkje av den moderne typen. Det humpar og ristar, og gummien klorar seg fast i det som er igjen av asfalten. Når den verste delen av vegen er overstått, kjører du gjennom tunet til Ingvald Kleivdal. Sjå opp for hunden før du tek ein skarp venstresving, to minuttar frå hovudvegen.

Gruar seg ikkje
? Det skal verta kjekt når det vert glatt, seier Ingvald Kleivdal og peikar på den krappe svingen i nedoverbakke, med holer i asfalten.
Før var krysset eit knutepunkt, no er det ikkje mykje trafikk att, noko som kanskje er like greitt. Når Seimtunellen stengjer, kan krysset igjen verta trafikkert på kveldstid.
? Problemet vert størst for dei som kjører her, ikkje for meg,  seier Kleivdal, som sjølv berre kjører om Kleivdal for avveksling ein gong i ny og ne.

Alternativ
I motsetnad til vegen om Kleivdal, der du stort sett har vegen heilt for deg sjølv, kan du om Skare treffa på både hestar, turgåarar, skuleborn og bilar. Det første kvarteret frå Knarvik er prega av ei femtisone som slyngar seg mellom skular, gardar og relativt tett busetnad. På grunn av svingete og smale vegar, meir trafikk og busetnad, tek det nærare 25 minutt å kjøra om Skare. Men vegdekket er betre enn om Kleivdal. Vegen om Hjelmås og Vaet har betre standard, og kan trygt vera eit alternativ til berg- og dalbane.
Kva omkjøring som er den beste, kjem alt an på kva som er viktigast for deg. Om du er glad i bilen din, tek du deg nokre minuttar ekstra bak rattet.