Ønskjer snøggbåt frå Knarvik

Årsaka til forslaget er frykt for at biltrafikken skal auka kraftig etter nyttår når Nordhordlandsbrua vert gratis. Difor ønskjer SV å skapa gode kollektive tilbod, og dei støttar også KrF sitt framlegg om kraftig reduksjon i prisane på busskort for bussar som køyrer over brua.

Allternativ til privatbilen

? Me treng trygge, komfortable og rimelege alternativ til privatbilen. Eg trur snøggbåt frå Knarvik kan vera eit slikt alternativ, uttalar Liv Glasser i ei melding. Ho er samferdselspolitikar for SV i fylkestinget. Glasser viser til at biltrafikken auka med heile 40 prosent umiddelbart då Sotrabrua vart gratis. Ho fryktar og at situasjonen vert endå verre når Askøybrua vert gratis neste år, og at det samstundes vert ein vekst i trafikken frå Sotra.

SV har ikkje oversikt enno over kva ei slik snøggbåtrute vil kosta.

? I første omgang må saka utgreiast av administrasjonen. Men me kjem altså til å føreslå dette no i samband med budsjettet, og håpar då at andre parti støttar forslaget, seier Glasser til Strilen. Ho trur og det er lurt at ei snøggbåtrute vil ha eit stopp på Frekhaug.

Må tilretteleggja

Også Meland-ordførar Solbjørg Åmdal Sandvik har uttrykt ønskje om å få på plass igjen snøggbåtruta.

? Det er viktig at ein ikkje legg vekk snøggbåten som eit alternativ, seier ho. ? Men dersom det kjem ein snøggbåt må ein og leggja til rette med parkeringsplassar og korresponderande bussar til og frå Frekhaug og Knarvik.

? Men er ikkje snøggbåt rekna som veldig forureinande?

? Det skjer jo mykje på den fronten også, både når det gjeld gass og anna. Dessutan kan eg ikkje skjøna at ein snøggbåt skal vera mindre miljøvennleg enn hundrevis av bilar i bilkø, seier Åmdal Sandvik.

Ho er heller ikkje redd for at ein snøggbåt skal redusera presset på å få betre vegsamband gjennom Åsane.