Ønskjer storinvestering på Mongstad

Tanken er at CO2-senteret skal ta imot CO2 i flytande form frå heile Europa. Dette skal transporterast med skip eller gjennom røyrleidningar. CO2 kan til dømes pumpast inn i oljebrønnar, for på den måten å få ut meir olje. I følgje Dagens Næringsliv (DN) er LO positive til planane.

? Så langt er ikkje planane presentert for Statoil, difor kan me ikkje ta stilling til dei enno, seier informasjonsleiar Kåre Ness ved Statoil Mongstad til Strilen.

Gigantiske investeringar

Det er snakk om investeringar på formidable 60 til 86 milliardar kroner. Dette skal til gjengjeld gje inntekter på mellom 600 og 1000 milliardar kroner over ein 40-års periode. DN viser til at det på Mongstad er kapasitet til å ta imot og lagra all CO2 frå Europa i 400 år. Mongstad har gode kaianlegg, hallar til lagring og snart vert ein røyrleidning til Troll-feltet ledig. Mongstad har i dag også det største punktutsleppet i landet av CO2 med 1,5 millionar tonn. Dersom ein også får eit gasskraftverk, vil utsleppa auka til 2,5 millionar tonn i året, i følgje DN. Eit anlegg for CO2-handtering vil altså kunna gjera noko med Statoil Mongstad sine eigne utslepp.

Vidare utgreiing

Naturvernforbundet har tidlegare sagt til Strilen at dersom dei får eit system for handtering av CO2 på Mongstad, vil dei stilla seg positiv til bygging av eit gasskraftverk.

Dersom ein no vel å tenkja verkeleg stort, slik dei omtalte planane skisserer, kan altså dette verta langt meir omfattande enn det som tidlegare har vore drøfta.

Også informasjonsleiar Kåre Ness ved Statoil Mongstad har tidlegare sagt at dei er positive til CO2-handtering, men at det ikkje er økonomi til dette i det planlagte gasskraftverket dei har søkt om konsesjon til. Vert det stilt krav til CO2-handtering i samband med kraftverket, vert prosjektet lagt dødt.

Situasjonen vert likevel ein annan dersom staten vil delta i finansieringa.

20 millionar

Dagens Næringsliv fekk ingen kommentarar verken frå Statoil eller frå Olje- og energiminister Odd Roger Enoksen. Men regjeringa skal ha sett av 20 millionar kroner til det vidare utgreiingsarbeidet.