Opna Sjausetvatn vassverk

«Det er gøy med vinter og snø» song Tonje Person Farstad, og då burde ho ha ei lukkeleg stund ved Sjausetvatn, for der lava snøen ned under opningshøgtida for vassverket i går. Litt verre vart det for dei som skulle koma seg derifrå med bil etterpå.

Dei to jentene frå Ostereidet barneskule fekk saman med lærar Else Iren Westervik stå for det kunstneriske då vassverket vart opna.

? Ei god og sikker vassforsyning er viktig også for den oppveksande slekt, sa ordførar Tove Linnea Brandvik, som tok seg av snorklippinga. Snora var elles ein rest frå snora kongen klipte over på Flatøy då brua vart opna i 1994.

Seks år

Seremonien i går markerte avslutninga på ei seks år lang vassverkutbygging i Osterfjorden. Vassverket med reinseanlegg og høgdebasseng på Sjauset har vore i drift sidan 2001, men no er leidningsnett på land og i sjø kome heilt inn til Ostereidet.

? Det inneber at byggestoppen som har vore gjeldande enkelte stader på strekning, no kan opphevast heilt, sa kommunalsjef Kåre Jordal.

Ein del nye byggefelt er alt under utbygging, og fleire er på trappene.

Ordføraren var sikker på at det at ein no kan tilby sikker vassforsyning, vil ha mykje å seia for utviklinga i denne delen av kommunen.

Reserve

I tillegg til å sikra vassforsyninga frå Leiknes til Ostereidet, skal vassverket på Sjauset og vera reservevasskjelde for Lindås kommune. Men då må dette vassverket koplast saman med hovudvasskjelda i Storavatnet. Så langt har ein førebels ikkje kome.

Totalt har det kosta om lag 30 millionar kroner å byggja ut vassforsyninga langs Osterfjorden, kunne avdelingsleiar i Lindås kommune, John Bauge, fortelja.

Vassverket har kapasitet til å forsyna 3000 menneske. I dag er rundt 300 husstandar knytte til vassverket, og talet aukar heile tida.

? Vatnet her held ein høg kvalitet, og i tillegg sikrar reiseanlegget at bakteriar og virus vert fjerna, sa Bauge.

Framleis står det att utbygging av nokre høgdebasseng og leidningar for at alle langs Osterfjorden skal kunna få vatn frå vassverket. Og i Lindås kommune sin investeringsplan for vatn er det enno att 60 millionar kroner i investeringar fram til 2012.