Opnar nettkafé

Det skjer ved hjelp av dugnad og tilskot frå organisasjonen «Ung i Europa».

Opning av kaféen i løpet av februar er målet til dei fire, som har vore medlemer i ungdomsklubben i mange år. Korleis opninga skal markerast, er ikkje heilt klart. Å invitera til datehelg er eitt alternativ.

? Mange unge «heng» på senteret og andre stader, så me trur det vil verta god oppslutning om tilbodet, seier Heidi Sæbø.

Internett-kafé har lenge vore mangelvare i Meland. No kjem det også eit tilbod i den nye idrettshallen på Fossemyra. Det viste ikkje jentene i ungdomsklubben om då dei søkte «Ung i europa» om tilskot. Men dei er ikkje så redde for at ikkje  tilbodet i ungdomsklubben vil verta brukt.

«Ung i Europa» er ein organisasjon som støttar opp om tilbod som ikkje finst i nærmiljøet.

? Me søkte i oktober, og rett før jul kom meldinga om at me var innvilga 67.000 kroner. 75 prosent av beløpet vert utbetalt no i startfasen, resten når me kan visa at alt går bra, opplyser Beate Losnegård Fosse.

Jentene har alt malt på nytt den delen av klubben som skal brukast til kaféen. Dei har også fått i boks avtale for oppføring av ein skillevegg.

Breidband-tilkopling vert det kommunen sin jobb å få på plass. Avtale om innkjøp av seks pc-ar og like mange skrivarar er gjort, og litt nye møblar og gardiner skal kjøpast inn. Logo for kaféen er under produksjon av elevar ved teikning, form og farge ved Knarvik vidaregåande.

? Kaféen kjem til å verta open i alle fall om søndagane og til andre tider ungdomsklubben ikkje er i bruk. 

Å gå på kafén og bruka nettet vert gratis. Dei som vil handla noko i kiosken, må naturleg nok betala for det. Klubbleiar Evy Bengtsson opplyser at pc-ane vil vera tilgjengelege også på ungdomsklubben sine kveldar.