Opprør i Alversund-bygda

Frustrasjonen er ikkje til å ta feil av blant lag og organisasjonar i Alversund. I går ettermiddag stilte mange av leiarane opp på kort varsel ved Alversund skule. Laga som var representerte var I.L Alvidra, Ikenberget Vel, Alvermarka Vel, Hilland Vest Velforeining, Alversund helselag, ungdomslaga i Alverstraumen og FAU. Motstanden mot ein stor ungdomsskule i Knarvik og inga utbygging i Alversund er stor.

Krev skule i Alversund
? Det bur heile 3000 menneske i Alversund-området. No må noko gjerast for at desse også skal ha eit godt skule og fritidstilbod, seier Magne Legernes i I.L. Alvidra.
Han meiner at kommunen ikkje berre kan leggja tilrette for bustader, då dei ønskjer skatteinntektene. No må kommunen gje noko tilbake.
Legernes meiner at det må byggjast både ny ungdomsskule og idrettsanlegg i Alversund.
? FAU i Alversund ønskjer ein ungdomsskule i Alversund og FAU i Knarvik ønskjer det. Likevel føresler altså dette utvalet som har sett på skulestrukturen å samla alle ungdomsskuleelevane på ein stor skule i Knarvik, seier Legernes.
Han meiner pengane kommunen har sett av til ungdomsskule, først og fremst må gå til å byggja ny ungdomsskule i Alversund, då det er i dette området situasjonen er mest akutt.

64 førsteklassingar
? Skulen er for liten. Eg trur ikkje kommunen har heilt klart for seg kva dei skal gjera når det kjem heile 64 førsteklassingar til Alversund skule til hausten, seier han.
Samstundes forstår han at det må gjerast noko med Leiknes skule, og etter kvart må nok og Knarvik ungdomsskule byggjast ut. Men utviding i Knarvik kan ein enno venta litt med, meiner han.
? Me har vore altfor tålmodige i Alversund. Me har kanskje ikkje vore flinke nok til å organisera oss, seier Legernes.

Innleiar frå Flaktveit
Men dette har dei altså tenkt å gjera noko med. 11. mai vert det folkemøte i bygda, der lag og organisasjonar skal samlast. Dei har fått tak i Frode Bergo Larsen frå Flaktveit som innleiar til folkemøtet.
? På Flaktveit hadde dei ein liknande situasjon som i Alversund. Det var stor byggjeaktivitet, utan at kommunen følgde opp med infrastruktur innan skule og fritid i buområdet. Bumiljøet vart etter kvart så dårleg at folk nesten måtte gje vekk husa sine for å verta kvitt dei, seier Legernes.
På Flaktveit kom ein så i gang med å laga mellom anna idrettsanlegg og ny skule. Det løyste dei aller fleste problema, hevdar Legernes.