Ørna et og har det bra

– Ørna et og har det bra. Ho ser ut til å koma seg, fekk Strilen opplyst av Ane Rong i Norges Miljøvernforbund i går ettermiddag.
Ørna er no heime hos Kurt Oddekalv, i eit bur på 20 gonger 20 meter.

Ikkje beinbrot
Torsdag hadde Oddekalv ørna med til Tertnes dyreklinkk i Åsane. Der vart ho undersøkt av dyrlege Ulf Erlandsen, som fastslo at ørna truleg ikkje hadde beinbrot verken i vengen eller andre stader, men kanskje hadde strekkskadar. Utsiktene for at ørna skal koma seg, er difor gode.

Krangel
Havørna utløyste tidlegare i veka ein viss krangel mellom Kurt Oddekalv og ørneekspert Magne Helge Sleire i Masfjorden.
Sleire fortel til Strilen at han vart kontakta av viltnemnda i Lindås for å ta seg av ei havørn som gjekk rundt på området til Mongstadbase. Men då han onsdag morgon kom til Mongstad for å ta seg av ørna, var ho borte.

Det viste seg seinare at nokon på basen hadde teke ørna inn i ein hall der. Sleire reiste tilbake til Mongstad ved tretida om ettermiddagen, men då var ørna igjen borte. Då viste det seg at Kurt Oddekalv hadde vore og henta ørna.

Lang erfaring
– Eg har jobba med berging av ørner sidan 1980-talet og har lang erfaring i dette. Ofte er det meg folk tek kontakt med når dei finn ei skada ørn, seier Sleire.
Han finn det rart at Oddekalv berre kjem og hentar ørna utan vidare, men kjem ikkje til å forfølgja saka vidare.

– Men eg veit at Fylkesmannen vurderer saka, seier Sleire til Strilen torsdag.

– Eg vart kontakta av lokale representantar på Mongstad som lurte på kva dei skulle gjera med ørna. Difor henta eg henne, og eg skal ta vare på henne og sleppa ho fri når ho er frisk nok til det, sa Oddekalv til bt.no onsdag.

Uklart
– Me har ikkje noko dyrepoliti i Noreg, så det er ikkje klare prosedyrar i slike saker, seier Stein Byrkjeland hos Fylkesmannen til Strilen.

Han fekk melding om ørna måndag, og i samråd men lensmann og viltnemnd vart det avgjort at ein skulle kontakta Magne Helge Sleire.

Det som har vidare skjedd, viser berre kva som kan skje når mange folk er innblanda, seier han. Fylkesmannen kjem ikkje til å gjera noko meir i saka i denne omgang.
Byrkjeland kan elles fortelja at han har fått mange telefonar frå media etter at saka vart kjend i bt.no.