Over 500 Meland-underskrifter mot bom

? Listene me har på Esso-stasjonen på Mjåtveit har passert 540 namn, seier Svein-Atle Engeseth i «Folkeaksjonen nei til meir bompengar i Nordhordland».
Engeseth er leiar av interimstyret i organisasjonen, som arbeider for å hindra at det kjem nye bompengeprosjekt til regionen. Aksjonen er eit svar på planane om ein «Nordhordlandspakke», der bompengar skal vera med på å finansiera Nyborgtunnel og ei rekkje vegprosjekt ulike stader i Nordhordland.
Bompengeaksjonistane har også lagt ut lister på Shell-stasjonen på Lindås, her har meir enn 150 personar sett namnet sitt under kravet om å sleppa meir bompengar.

Møte onsdag kveld
Onsdag kveld inviterer folkeaksjonen til møte i Knarvik, eit møte som er ope for alle. Her skal dei diskutera nærare planane om eit folkemøte om bompengar, og andre aktivitetar aksjonen skal ha framover.
? Me treng fleire folk i organisasjonen, så eg vonar at fleire kjem på møtet. Denne aksjonen kjem nok til å vara ei stund, og me treng fleire folk som kan vera med og stå på, seier Svein-Atle Engeseth.

Stand på laurdag
Til helga planlegg Engeseth og dei andre i interimstyret stand både i Knarvik Senter og på Frekhaug Torg. Folkeaksjonen mot bompengar er på plass i dei to sentra frå 11.00 til 15.00, og då vert det mogleg både å skriva under mot bompengar og kjøpa klistremerke og anna materiell frå Nei til bom-aksjonen.
? Det er rett nok vinterferie denne veka, men det var viktig for oss å koma i gang fort, seier Engeseth.

Ring ein politikar
Svein-Atle Engeseth oppfordrar folk til å ringa eller skriva til politikarane, for å samla støtte til aksjonen mot meir bompengar. Særleg aktuelt meiner han at dette er i Meland, der kommunestyret ikkje har sa til bompengar, men samstundes har støtta opprettinga av selskapet Nordhordlandspakken AS.
? Slik me oppfattar vedtaket i kommunestyret er det eit nei til meir bompengar. No må me berre sjå til at dei ikkje snur, seier Engeseth.

Tek bussen
Sjølv om melandbuen Engeseth leiar aksjonen mot bompengar, betyr ikkje det at han sjølv vert sterkt ramma av eit eventuelt bompengeprosjekt. Rett nok har han arbeidsplassen sin i Bergen, men til og frå arbeid tek han bussen.
? Det er behageleg å reisa med bussen, seier Engeseth.
Samstundes forstår han dei som ikkje har høve til å bruka kollektivtransport til arbeid sørom fjorden.
? Eg arbeider på Høgskulen i Bergen, og har kort veg frå Busstasjonen. Eg skjøner at dei ikkje er like enkelt å ta buss for dei som må ta to bussar for å koma seg på arbeid, særleg om det er buss frå to ulike selskap.

Eiga nettside
Folkeaksjonen mot bompengar har fått oppretta ei eiga nettside, med den adressa «neitilbom.com». På nettsida informerer dei mellom anna om kva aktivitetar som er under planlegging.