Øystein sette ny løyperekord

? Eg vart oppfordra til å knekka løyperekorden, så då måtte eg jo nesten gjera det, seier Øystein Sylta og ler.
Han har ikkje tal på kor mange gonger han har stilt opp i romjulsløpet på Lindås. Det har etterkvart vorte ein kjekk tradisjon. Det same gjeld sigeren. Sylta har vunne år etter år. Likevel har han aldri tidlegare prøvd å slå rekorden i den 3.8 kilometer lange løypa.
Den gamle rekorden vart sett i 1997. Då sprang Kjetil Dynvik frå Voss inn på tida 12,21.
I år sprang Sylta i mål på 11, 52. Dermed slo han den gamle rekorden med god margin.
Ein har tidlegare trudd at løypa  for romjulsløpet på Lindås var noko lengre, men ei kontrollmåling gjort i samband med årets løp viser at rett lengde er 3.830 meter.

Hardkjør
Romjulsløpet er mest for kos å rekna for Øystein Sylta. Han er alt i gang med hardkjøret før den komande sesongen.
? Eg kan kjenna blodsmaken berre med tanken.
Sylta ler litt. Han er ikkje sikker på om han gler seg.
? Det vert garantert knallhard trening. I år vil eg auka treningsmengda og satse på fleire kvalitetsøkter, seier han.
Målet er å pressa tida ned mot 8,30 på 3000 meter hinder. Han håpar også på at han får delta i VM i Japan til hausten.
Friidrettsforbundet har ikkje kunngjort kva tidskrav ein må klara for å koma med til VM i Japan i 2007, men til EM i Gøteborg i haust måtte ein for 3000 hinder koma under 8.35.

Overraska seg sjølv
I alt 172 deltakarar stilte til start i årets romjulsløp på Lindås. Fleire av desse var unge og relativt ferske løparar. Thomas Brakstad (17) overraska både seg sjølv og konkurrentane. Ungguten kom i mål som nummer to etter å ha gjort unna løpet på 14 minutt.
? Det var veldig kjekt. Eg gjorde det mykje betre enn eg venta, seier han og smiler stort.
Brakstad er ikkje med på organisert trening. I staden trenar han saman med ein kameratgjeng på Lindås. Brakstad låg på trygt på tredjeplass i nesten heile løpet. I siste bakken tok han sjansen og sprang seg opp til andreplass.
? Eg kjørte hardt på, men det gjekk fint, seier han.
Andreplassen gjev meirsmak. No vil ungdommen ut og prøva seg i fleire løp.