Pærebrann også på Kaland

? Det var ein prøve tatt frå bulkemispel torsdag i førre veke som viste seg å vera positiv, opplyser inspektør Beate Blytt
Stadfestinga kom frå Bioforsk på Ås, som analyserer prøvar Mattilsynet tek. Blytt har det for tida travelt med å undersøkja lokale mistankar om angrep av pærebrann, som kan spreia seg svært raskt.

Ta berre kontakt
? Mange har tatt kontakt etter oppslag i lokalpressa, og det er berre bra. Me vil undersøkja alle mistankar me rekk over, seier Blytt.
Mattilsynet har innført forbod mot å flytta bikubar inn og ut av kommunane i Nordhordland. Bulkemisplar må fjernast, uansett om dei er angripne eller ikkje.
? Hageeigaren på Kaland er innforstått med at misplane, som står som hekk, må fjernast, seier Beate Blytt. I går undersøkte ho fleire mistankar i Austrheim og følgde opp opprydding etter tilfellet av pærebrann på misplar i nærleiken av Austrheim kyrkje.
? Pærebrann spreier seg oftast med bier, men og med andre insekt. Plantesjukdomen kan også spreia seg med hagereiskapar og sjølvsagt via avleggjarar, påpeikar Blytt.
Så langt har det ikkje kome melding om angrep på frukttre i Nordhordland, opplyste ho ved 12.30-tida i går.

Ved Sæbø kyrkje?
Folk med god fagkunnskap meiner at Sæbø kyrkje har ein bulkemispelhekk på eine sida. Dette vil verta nærare undersøkt.
? Eg har ikkje fagkunnskap på dette området. Men er det slik mispel ved kyrkja, må me ta ansvar for det og få den fjerna, uttalte kyrkjeverje Meinert Helland i går. Etter tips frå Strilen melde han frå til Mattilsynet og avventa ein kontroll i regi av deira fagfolk.