Parkeringplass snudd tilbake

? Når me såg at endringa me gjorde ikkje fungerte, valde me å snu parkeringsplassen tilbake til om lag slik han var tidlegare, seier senterleiar Tor Ryland til Strilen. Han fortel at senterforeininga heile tida har hatt ein god dialog med Meland kommune om saka.

Kaotiske tilstandar

Strilen skreiv om saka 1. oktober etter ein perioden med klager og litt kaotiske tilstandar på parkeringsplassen. Det oppstod til dømes ofte små trafikkorkar når bilane skulle inn og ut frå parkeringsplassen. Det hadde og vore eit par tilfelle med småbulking av bilar. Endringa var i første omgang gjort for å rusta opp parkeringsplassen i samband med at Frekhaug senter vart vald som 1000-års stad. Planen var å laga ein meir framtidsretta og miljøvenleg parkeringsplass. Men endringa førte altså til at plassen fungerte dårleg som det han først og fremst skulle vera ? ein stad der folk kunne parkera bilane sine medan dei handla.

Endra tilbake

? Den gongen plassen vart endra hadde me med ein klausul om at me måtte gå tilbake dersom det nye opplegget ikkje fungerte. Det er nettopp det me no har gjort, seier Ryland.

Han synest ikkje det er eit problem å gå tilbake på ting dersom noko ikkje fungerer, og håpar no at folk vert meir nøgde. Endringa tok litt tid, då dei var avhengige av veret. Han seier ein ikkje kunne gjera dette arbeidet med alt regnet som kom tidlegare denne månaden. Talet på parkeringsplassar har også auka litt no, til om lag 85 plassar.

Kundane nøgde

Strilen møtte fredag fleire personar på Frekhaug senter som gav uttrykk for at dei er svært nøgde med at parkeringa no er endra tilbake.

? Endeleg. Dette er veldig mykje betre enn slik det var for litt sidan, seier Lillian Husebø.

Reidar Mjåtveit er einig. Han brukar å vera innom senteret nesten kvar dag.

? Eg hadde ikkje direkte problem med slik det var, men det var litt vanskeleg å koma seg ut frå parkeringsplassen. Slik det har vorte no er i alle fall mykje betre, seier han.

Klagar på parkering

Stilen kjenner elles til at det har vore litt klagar på at tilsette brukar parkeringsplassen på senteret medan dei er på jobb.

Det står skilt ved hovudparkeringsplassen at ein kan stå der maks tre timar.

Ryland seier at dei arbeider med å få tilsette i senteret til å bruka andre parkeringsplassar medan dei er på jobb.

Det vil og om kort tid koma fleire parkeringsplassar der folk kan stå litt lenger, blant anna bak Lingjerde-bygget. Den store parkeringsplassen er til for folk som skal handla i senteret eller få utført tenester der, seier han.