Parkeringshus opnar for ny senterutviding

Parkeringshuset kjem like nordom den planlagde rundkjøringa ved krysset ved Foss-bygget. Her skal det lagast til parkeringshus for rundt 600 bilar, og med mellom 2000 og 2500 kvadratmeter næringsareal til ein kolonialbutikk med ferskvaretilbod.
Dette fortel Olav Kåre Vatnøy og Oddvar Rune Villanger i det nyoppretta selskapet Knarvik Senterutvikling AS.
Dei reknar med at prosjektet kjem på rundt 60 millionar kroner.

Start neste år
Vatnøy, som er styreleiar i Knarvik Senterutvikling, fortel at dei har hatt god kontakt med Lindås kommune som eig tomta. Denne er sett av til parkeringsføremål i kommuneplanen. Eit parkeringshus like ved den nye rundkjøringa opp til senteret, meiner Vatnøy er heilt ideelt.
? Me har håp om å kunna setja spaden i jorda i løpet av neste år, seier han, men presiserer at dette er avhengig av mellom anna saksbehandlingstida.
Han seier dei ikkje har avtalar med nokon daglegvarekjede enno, men at ein butikk med eit ferskvaretilbod er noko dei ønskjer til senteret.

Opnar for utviding
Vatnøy og Villanger seier at manglande parkeringsplassar i dag er det som hindrar Knarvik Senter i å veksa vidare. No når dette kjem på plass, vil mykje liggja til rette for ei større utbygging i senteret.
? Det er stor interesse for å etablera seg i Knarvik Senter, og det er i dag bedrifter som står på venteliste, seier Vatnøy.
Potensialet for utviding i senteret er stort, påpeikar Vatnøy og Villanger.
Mellom anna kan dette skje ved å byggja i høgda.
Men så langt har manglande parkering vore avgrensinga. Men ved å auka talet parkeringsplassar med 600 frå dei frå  dei rundt 720 i dag, vil mykje vera løyst. I dag er det 28.000 kvadratmeter næringsareal i Knarvik Senter.

Eitt parkeringshus til
Ved den andre planlagde rundkøyringa, der som innkjøringa til senteret er i dag, er det og planar for eit parkeringshus. Men Vatnøy seier at dette må koma litt seinare.
Med det nye vegsystemet vil folk få tilgang til senteret frå to innkjøringar. Desse rundkjøringane er tenkt finansiert gjennom den bompengefinansierte Nord-hordlandspakken.
? Kva om pakken ikkje vert vedteken?
? Då finn me nok ei løysing, seier Vatnøy.
Dei planlegg altså å byggja parkeringshuset uansett. Parkeringshuset er så langt tenkt med tre etasjar under bakken og to over.
På den måten vil det ikkje ruva i landskapet i Knarvik.