Pendlarar kan jubla

Samferdselskomiteen i fylket vedtok onsdag at prisen for periodekort mellom Nordhordland og Bergen skal reduserast med førti prosent frå nyttår. Ordninga skal fungera som eit prøveprosjekt frå 1. januar 2005 til 1. juni 2006. I dag kostar eit periodekort på strekninga Knarvik eller Frekhaug ? Bergen 1050 kroner, etter nyttår vert prisen 630 kroner.

? Dette viser at me meinte alvor når me lova å gjera noko med kollektivtilbodet når brua vart gratis, seier Pål Kårbø, fylkespolitikar for KrF.
Internt i fleirtalskoalisjonen i fylket er det KrF som har vore pådrivar for å få redusert taksten mellom Bergen og Nordhordland. Med Grethe Lunde og Pål Kårbø i spissen har partiet fått med seg dei to andre partia (Høgre og Framstegspartiet) på å sponsa dei bussreisande litt for å redusera talet på privatbilar.

Førti prosent uansett
Kårbø tolkar vedtaket i samferdselskomiteen slik at prisen på periodekort skal reduserast med førti prosent av heile prisen på kortet, anten ein no reiser frå Manger eller Knarvik og til Bergen.
? Det må verta slik at alle som brukar periodekort og reiser over Nordhordlandsbrua får redusert prisen på kortet med førti prosent, seier Pål Kårbø.
Akkurat dette var ikkje nøyaktig sett opp i gårsdagens vedtak i samferdselskomiteen, men Kårbø meiner at førti prosent rabatt uansett lengde på reisa må vera det rette.
? Det kan ikkje vera slik at ein som reiser frå Manger og til Bergen berre skal få førti prosent reduksjon på strekninga Knar-vik-Bergen, seier Kårbø.

 ? Flott med reduksjon
Arvid Monstad frå Vollom brukar ofte å køyra med privatbil til Knarvik, og tek så bussen derifrå til Bergen. Rutene til og frå Vollom passar ikkje så godt med arbeidstida.
? Har du vurdert å køyra privatbil heilt til Bergen når brua vert gratis?
? Nei, eg hadde nok teke bussen uansett, bortsett frå enkelte gongar. Men denne prisreduksjonen på periodekortet var jo veldig flott, seier han.
Vedtaket i samferdselsutvalet var samrøystes.
Torsdag skal saka opp i fylkesutvalet, men så lenge ingen ombestemmer seg over natta skal det gå greitt å få vedteke prisreduksjonen også der.

Helst fleire med buss
Prøveprosjektet startar samstundes med at det vert gratis å køyra over Nordhordlandsbrua, og skal vera med på å motverka at alle som i dag tek bussen skiftar over til privatbil.
? Om dette prøveprosjektet går bra, vil det verta vidareført, seier Pål Kårbø.
Helst skal ein få fleire til å reisa kollektivt, slik at ikkje det vert kø av arbeidspendlarar på vegen til Bergen. Men Kårbø vil ikkje seia no kor mange fleire som må ta bussen.
? Eg vil ikkje setja noko krav om 36,9 auke her, seier han.
Om tiltaket gjer at fleire tek bussen, kan det verta aktuelt å redusera prisen på periodekort også på andre strekningar. Askøybrua vert nedbetalt i 2006, og også der ventar ein auke i privatbilismen. Også i retning sør frå Bergen, mot Os, er det aktuelt med redusert pris på periodekort dersom dette slår an i Nordhordland.

Ramme på to millionar
Det er rekna ut at det vil kosta kring 1,5 millionar å redusera prisen på periodekorta mellom Nordhordland og Bergen med førti prosent. No legg ein opp til å setja av to millionar til prosjektet, slik at det vil stå pengar klar dersom prøveprosjektet skal vidareførast etter 1. juni.
Pål Kårbø er sjølv ein av mange som bur i Nordhordland og har arbeid sørom fjorden. Men han brukar bilen til og frå.
? Eg køyrer, så dette er ikkje noko eg har gjort for meg sjølv, seier han med eit smil.
Men om ikkje takstreduksjonen gjev innsparingar i lommeboka, kan det gje mindre kø på vegen til arbeid.
? Om me ikkje hadde fått til dette, ville det verta spanande å sjå kva som ville skjedd etter nyttår. Når det er kø startar det gjerne i Eidsvåg, og sjølve flaskehalsen er inne ved Helleveien, like ved Sandviken sjukehus, seier Kårbø.