Piggane ute mot ny avgift

? Hadde avgifta skulla gjelda innanfor bompengeringen i Bergen, så kunne eg forstå det. Men at me, som berre køyrer nokre kilometer inn i Bergen kommune, skal måtta betala denne avgifta, er ganske surt, seier Harald Sætre til Strilen.
Han bur på Sætre på Radøy, og vegane der er slik at han treng å bruka piggdekk.
Og Sætre har ikkje vanskar med å få oppslutning om dette synet hos andre som jobbar på Rolls-Royce på Hordvikneset.

Ikkje strøtt
? Eg bur på Lygra, og på vegane dit kan det vera så som så med både brøyting og strøing, seier Geir Ove Pletten.
Også Oddvar Opdal, som bur i Knarvik, vert ramma av den nye avgifta på 1200 kroner i året.
? Dette har vore mykje omsnakka på jobben her, og alle tykkjer det er trasig å måtta ut med desse kronene, men det nyttar vel ikkje å protestera heller, sukkar Sætre.
Men han tykkjer at dei som innførde denne avgifta, kunne tenkt litt meir gjennom ting før dei sette ho i verk.
Berre hos Rolls-Royce på Hordvikneset jobbar det opp mot 150 personar som bur på nordsida av fjorden, og ein god del brukar piggdekk.

På hytta
Torgeir Nordland jobbar også på Hordvikneset. Han bur i Knarvik og treng ikkje piggdekk på bilen for å køyra på jobb.
?  Men me har hytte i Andvik i Masfjorden, og  der er me ofte. Der inne er vegane slik at me treng piggdekk, seier han.
Difor pungar han ut med dei 1200 kronene til Bergen kommune, men tykkjer det er urettvist.
? Avgifta er innførd for å betra miljøet i Bergen sentrum, og den vesle turen me køyrer her ute, påverkar ikkje det, seier han.
Han tykkjer og at avgifta kunne vore innførde gradvis, slik at dei som har nye piggdekk, kunne få slite dei ut.
Dei som arbeider på Hordvikneset, køyrer vel seks kilometer kvar veg innanfor bygrensa, målt frå midten på Nordhordlandsbrua.

Kan ikkje handheva
Det er Bergen Parkeringsselskap som har fått ansvaret for å krevja inn den nye piggdekkavgifta som politikarane i Bergen kommune har innført frå 1. november. Det er også parkeringsvaktene som skal sjå til at bilistane som køyrer innanfor kommunen sine grenser med piggdekk, har betalt avgifta, enten i form av ei eingongsavgift på 1200 kroner året, eller som oblat pr. dag til 30 kroner.
? Her er rimeleg hektisk for tida, og me har masse å gjera med å svara på spørsmål og senda ut oblat og rekningar, seier Bjørg Hatlem, som er direktør i parkeringsselskapet, til Strilen.

Ikkje meir folk
Hatlem fortel at parkeringsselskapet så langt ikkje har fått oppretta nye stillingar, verken for å administrera den nye avgifta, eller til folk som skal kontrollera at avgifta er betalt.
? I  kontrollarbeidet vil me og få assistanse frå politiet og folk frå Statens vegvesen, seier ho.

I Vågsbotn
Den næraste automaten for sal av dagsoblatar, skal stå i Vågsbotn i Åsane. Fleire Strilen har vore i kontakt med, lurer på om dei risikerer noko viss dei køyrer dit og kjøper oblat.
? Vil dei verta kontrollerte mellom Klauvaneset og Vågsbotn?
? Eg trur sjansen for det er ganske liten, seier Hatlem, men viser til at oblatar også kan kjøpast på internett og via SMS.
Elles vert oblatane selde på Statoil sine bensinstasjonar, men ein slik finst ikkje i Knarvik eller på Frekhaug. De næraste er på Eikanger eller Hope i Lindås, viss ein ikkje tek sjansen på å køyra til Helleveien i Bergen.