Planar klare for skyttarhus

? Me har levert søknaden om tippemidlar til kommunen, og viss me får positivt svar, er me klare til å setja i gang bygging av skyttarhus, seier leiar Bjørn Ingvar Oppedal i Oppedal/Brekke skyttarlag til Strilen.

Tomt har dei fått frå kommunen, og planar og teikningar er klare.

Seks plassar

? Me håpar på ei avklaring til sommaren om me kjem med på fylket si liste for tildeling av tippemidlar, seier Oppedal.

Skyttarhuset er kostnadsrekna til 1,8 millionar kroner. Det skal innehalda ei femten meter lang skytebane med elektroniske skiver. Bana skal ha plass til seks skyttarar om gongen.

? Det er minimum for å få tilskot, seier Oppedal. I tillegg vil der vera garderobeanlegg, kjøkken og opphaldsrom, slik at ein kan avvikla mindre skytestemne der.

Stort løft

? Skal ein driva med skyting på litt høgt nivå i dag, må ein kunna trena heile året, seier Oppedal som ei forklaring på kvifor dei ønskjer seg innandørs skytebane.

Laget har medlemer både frå Gulen og Masfjorden, og dei har hatt folk på kongelaget på Landsskyttarstemnet nyleg.

Av dei 1,8 millionane som huset skal kosta, utgjer spelemidlane 592.000 kroner. 100.000 kroner har ein på bok, og 520.000 skal skaffast ved dugnad og annan eigeninnsats. Vidare reknar ein med 270.000 kroner i gåver og rabattar, og då står det att 358.000 kroner, som må lånast.

? Det er eit løft, men me er gjeldfrie frå før, fortel Oppedal.