Planlegg nytt bom-prosjekt

Kommunane i Nordhordland stiller seg samla bak tanken om eit framtidig tverrsamband over Askøy mot Sotra. Det slo Masfjorden-ordførar Håkon Matre fast under eit interkommunalt toppmøte på Herdla onsdag i denne veka.
Den undersjøiske tunnel er tenkt å gå frå Mjølkevikvarden Industriområdet like sør for Herdla til Io i Meland.

Viktig for Nordhordland
? Eit tverrsamband med undersjøisk tunnel frå Meland til nordre Askøy vil vera av svært stor interesse for heile Nordhordland, og det av fleire grunnar, seier Håkon Matre, leiar for regionrådet i Nordhordland.
? Ikkje berre vil det gje ein ytre ringveg som vil gjera avstandane kortare for både næringsliv og trafikkantar, men den er og interessant ut frå sikkerheitsmessige grunnar, i fall om brua skulle bli stengt, sier han.
Matre peikar likevel på at tverrsambandet ikkje kan varta aktuelt før dei to første fasane i Nordhordlandspakken, er på plass.

Toppane samla
Det interkommunale stormøtet på Herdla onsdag, samla dei tre ordførarane frå sotrakommunane. Albrigt Sangolt, Jan Utkilen og Olav Martin Vik. Vidare vegsjef Olav Finne, fylkesvaraordførar Tom-Christer Nilsen, komitéleiar i Askøy, Asbjørn Pettersen, varaordførar i Radøy Ragnar Floen, varaordførar i Meland Helge Bauge, byråd Hans Edvard Seim frå Bergen, og nemnde Håkon Matre.
Initiativet til møtet kom frå Herdla-mannen Kjell Kristensen, som på 60-talet gjekk i bresjen for å byggja bru til Herdla, og som i byrjinga av 80-talet fekk fart i byggjinga av Askøybrua ved å innføre førehandsbompengar på Askøy-ferjene.
No står den same Kristensen i bresjen for å oppretta eit tverrsamband mellom Nordhordland, Askøy og Sotra, mellom anna ved å føreslå ein undersjøisk tunnel frå industriområdet Mjølkevikvarden like sør for Herdla, over til Meland med veg vidare både mot Radøy og mot Knarvik i sør. Denne ytre ringvegen vil mellom anna bety redusert trafikkbelastning i flaskehalsane i Bergen.

Industriell vekst?
Dei vidare planane innlemmar ei ferje mellom Sotra og Askøy, noko som vil gjere avstandane mellom industriverksemdene på Mongstad og Kollsnes/Sture i Øygarden minimale, samanlikna med dagens omveg om Bergen.
Tanken på dette vart møtt med stor interesse hos samtlege deltakarar, men varaordførar Ragnar Floen i Radøy peika likevel på at det ikkje var nok å byggja tunnel.
? Vegane i Meland og Radøy må og opprustasT til å ta imot den auka trafikken, gjorde han klart.
? Dersom me vil, så får me dette til, slo varaordførar i Meland, Helge Bauge, fast. Han tok til orde for å oppretta eit interkommunalt selskap som skulle føra prosjektet vidare og presentera det for regionråda med tanke på å få det inn i NTP på sikt.
? Eit slikt tverrsamband er særs viktig for utviklinga i heile regionen nord for Bergen, seier han.

Bompengar?
Vegsjef Olav Finne ved Statens Vegkontor avdeling Bergen, meinte planane var positive, men kunne ikkje lova pengar korkje til det eine eller det andre vegalternativet.
? Truleg må det mykje bompengar til i alle dei «vegpakkane» som er lagt fram, men det er positivt at ein no ser at både næringsliv og kommunar slår seg saman i vegspørsmåla, seier han. Finne meinte at det kunne vera lurt å invitera vegkontoret med i eit styre om ein eventuelt vil oppretta eit eige interkommunalt prosjektselskap for sambandet.

600 millionar?
Håkon Matre er med i ein førebels komité som skal føra tverrsambandprosjektet vidare. Ein tanke er å oppretta eit interkommunalt aksjeselskap der alle kommunar og næringsliv i regionen er med.
Byrådsleiar for finans i Bergen kommune, Hans Edvard Seim, var særs oppglødd over planane. Han rådde til at komitéen snarast sendte inn søknad til kommunane om midlar til eit forprosjekt, og meir eller mindre lova på staden å stilla seg positiv til ein slik søknad frå Bergen si side.
Med seg i komitéen fekk Matre varaordførar i Meland, Helge Bauge, ordførarar i Øygarden Olav Martin Vik, initiativtakar Kjell Kristensen Askøy, pluss ein offisiell innvalt representant frå Askøy kommune som kjem til seinare.
Dei totale kostnadane for tverrsambandet med tunnel og vegar på Meland og Radøy er grovrekna til om lag 600 millionar kroner. Truleg må det meste bompengefinansierast, då med eigen bomstasjon ved tunnelopninga til omlag 20 kroner for kvar passering. Tala er framleis veldig usikre. ? Vert det semje om det, vil me kunna få lånefinansiering, og dermed koma fort i gang. Det var nemleg slik me gjorde det på Askøybrua, seier initiativtakar Kjell Kristensen.