Plukkar bringebær i november!

? Dei har vorte lurt av eigen natur, seier Bjørg Fløysand og viser veg til fleire bringebærbusker i hagen sin på Walde.
Fire busker ber bær i november, og Bjørg trur nesten ikkje sine eigne auge.
? Dette har aldri skjedd før, eg har ikkje sett liknande, seier ho, som har budd på Holsnøy i 52 år.
I hagen har ho litt jordbær, bringebær, hundar, villsau, lysthus og mykje blomar.
? Alle sommarplantane som no står så fint, burde jo og vore ferdige no. Men dei står like fint, seier ho forundra.
Bjørg hadde alt plukka bringebæra for sesongen, men såg etterkvart at det vaks fram fleire. Det er buskene som skulle bera bær til neste år som no er blitt lurt av varme dagar og sol. Det seinaste ho har funne bringebær i hagen tidlegare, er i september. I september i år plukka ho nok bringebær til å pynta ei heil blautkake.
? Novemberbæra heldt nok berre til eit stykke, seier ho.
Men det er framleis grøne bær og knytingar att, så kanskje ho rekk eit stykke til om sola får varma og snøen let venta på seg.