Politisk skepsis til svartmaling i Knarvik

Spørsmålet frå Brunborg kom som ein interpellasjon i det siste kommunestyremøtet i Lindås. Bruken av svart som farge i Juvikstølen har også engasjert andre, som denne veka har tipsa Strilen om at malinga med den litt uvanlege husfargen er godt i gang.
Brunborg viser til at kommunen for fleire år sidan arbeidde ut retningslinjer for byggjeskikk. Dei omfattar både plassering i landskapet, materialval og fargeval.
Interpellasjonen viser til at «På Juvikstølen har vi på eit område fått fleire hus som ruvar i himmelsynet. Det vert no sagt at arkitekten firmaet har nytta, har pålagt at husa skal vera svarte i 10 år», skriv Brunborg.

Fritt fram?
Han viser til at husa slik dei er plasserte, laga og farga, vil prega korleis folk opplever Knarvikbygda, sidan husa er ein del av det offentlege rommet.
Brunborg spør om ordføraren synest det er greitt at einskilde entreprenørar og arkitektar fritt skal avgjera korleis bygda skal sjå ut. Og vil ordføraren ta initiativ til at vi igjen ser på retningslinene for husbygging?
Eit råd frå Brunborg er å be om obligatoriske fotomontasjar ved større utbyggingar, eventuelt oppretting av eit fasaderåd. Alternativet, slik Brunborg ser det, kan verta at Knarvik ved vidare utbygging vert ei «leikegrind» for einskildpersonar.

«Naturens eigen palett»
Svaret frå ordførar Tove Linnea Brandvik struttar av byråkratiske tilvisingar til både planverktøy, utbyggingsplan, vedtak i planutvalet og offentleg ettersyn. Det viser til at området arkitektonisk vil verta «ei blanding av materialar som tre, stein og glas i ein moderne komposisjon basert på enkle og knappe detaljar». I fargeval vil ein nytta «naturens eigen palett», frå ubehandla sølvgrå osp til svartbeisa trevirke.
Ein konsulent som vidarefører kommunen sitt estetikkprosjekt, har svart at «fargebruken er grunngjeven». Denne konsulenten synest det ville vera fint å planta til slik at effekten av grunnmur/garasjeanlegg i forkant vert dempa. Og mørke fargar vil generelt tona ned bygningsmassen medan lyse verkar framhevande, er rådet.
Svaret seier lite konkret om representanten Brunborg, som bur i Knarvik, vil få påverka fargevalet på nye prosjekt. Men ordføraren lova at retningslinjer for estetikk og utemiljø skal oppdaterast. Og ho peika på at det vil vera til god hjelp om det ved alle større saker kjem fotomontasjar eller 3-dimensjonale videoar som kan letta vurderingane.