Posten fann ikkje Radøy

Før jul skulle ordføraren i Meland senda julehelsing til Radøy-ordføraren. På konvolutten stod «Radøy kommune, 5931 Manger». Eit par dagar etter kom brevet i retur fordi adressa var ukjend.

? Det viste seg at me hadde skrive på feil postnummer. Det skulle vera 5936 Manger, og ikkje 5931. Eg forstår at det er viktig å bruka rett postnummer, men i dette tilfellet tykkjer er sant og seia det var noko underleg at dei ikkje skulle få brevet fram likevel. Det står trass alt Manger på brevet, seier Solbjørg Åmdal Sandvik til Strilen.

Ho vil ikkje laga ei stor sak av dette, men vedgår at ho vart litt irritert då brevet kom i retur. Nytt brev med korrekt adresse er sendt.

Beklaga

? I dette tilfellet må eg berre beklaga. Me burde greidd å få fram brevet til adressaten, seier informasjonssjef Eivind Rossen i Posten til Strilen.

Rossen lovar å følgja opp saka internt for å finna ut kva som har gått gale.

Han forklarar at det meste av posten vert sortert maskinelt etter postnummer, og viss det er feil der, kan brevet hamna feil.

Men normalt skal brev som ein ikkje finn adressaten til, verta tekne hand om av personar som skal prøva å finna fram til rette adressat.

Skal fram

? Så det er framleis eit mål for Posten å få posten fram, sjølv om det kan vera feil i adressa?

? Absolutt. Men spesielt no før jul er det mykje post med feil eller mangelfull adresse. Mange brukar gamle adresser og sjekkar ikkje at ho framleis er rett, seier Rossen.

Men både frå erfaringar i Strilen og anna hald kan det verka som Posten er ganske rask med å senda brev i retur viss ikkje adressa er heilt korrekt.