Protest mot industriområde

Fristen for å koma med merknader til kommuneplanen for Austrheim gjekk ut 20. oktober. Naturvernforbundet i Nordhordland er mellom dei som har kome med merknader. Dei meiner at miljøprofilen i planen er god på mange område, men reagerer veldig negativt på industriområdet ved Øksnes.
? Dette området var regulert som næringsområde for mange år sidan, og er berre vidareført i denne planen, seier rådmann Jan Olav Osen.
Han ønskjer ikkje å kommentera enkelte merknader til planen no, men vil leggja fram merknadene i samband med at politikarane skal ta stilling til planen i nær framtid.

Urørt område
Trass i at området lenge har vore regulert til næringsareal, har det ikkje skjedd noko til no. Men no når det er lagt ut ein ny kommuneplan, nyttar altså naturvernforbundet høvet til å prøva å få dette området vekk frå planen. Dei viser til at dette er eit mykje brukt og urørt naturområde, delvis tilrettelagt med stiar. Området grensar ut mot Åråsvågen, som er farleia inn mot eit nytt hytte- og bustadområde tett ved, eit større planlagt område i Breidvik på andre sida av vågen og eit planlagt tilbod av utleigehytter like ved. Naturvernforbundet i Nordhordland meiner at konfliktpotensialet mellom industri og hytter, bustader og friluftsliv er stort.

Skjerpa strandsonevern
? Saman med Hoplandsmarka er dette det største samanhengande ubebygde utmarksarealet i kommunen. Industriområdet har i tillegg lang strandline og legg beslag på mykje av strandsona i Åråsvågen, heiter det i brevet frå Naturvernforbundet.
Dei viser og til at det nasjonale strandsonevernet er innskjerpa, og at eit industriareal som er nesten like stort som kommunen sin del av Mongstad-anlegget, vil vera eit brutalt inngrep i eit verdifullt natur- og friluftsområde. Dei meiner at slike næringsareal bør konsentrerast til område der det er industri frå før, det vil seia Mongstad-området.