Protestar mot Nappane-utbygging

? Den kommunale vegen til Nappane er alt i dag i ferd med å siga ut. Han vil ikkje tola den store anleggstrafikken. Og mange som bur her vil få store ulemper med trafikken tett forbi seg, seier Ragna Gilborne.
Ho seier både fastbuande og bygdefolk vil prøva å stoppa dei gigantiske planane om over 200 ferieleilegheiter og hytter i strandkanten på Nappane, planar som den politiske leiinga i kommunen ønskjer velkomen.

Kom overraskande
At arbeidet no skal starta opp, slo i følgje Gilborne ned som ei bombe gjennom BA søndag.
? Ordførar Tove Linnea Branmdvik har sagt til oss at det er for seint å protestera. Men me har mange spørsmål og kjem til å undersøkja om kommunen har behandla saka på rett måte, seier Gilborne til Strilen
Det er nye eigarar av det frå før regulerte området som har sett fortgang i planane. Eigar er Lindås Utbyggingsselskap A/S med adresse Sandnes. Aktiv Prosjektmegling er engasjert til å marknadsføra anlegget, der det alt er seld leilegheiter og hytter for kring 70 millionar kroner.
Dei dyraste toppleilegheitane i funkis-anlegget er selde for kring fire millionar kroner. Prosjektet har fått namnet «Alverstraumen Brygge, Nappane». Salet så langt har skjedd til registrerte kundar, utan offentleg marknadsføring.
Utbyggjar viser til at kommunen har godkjend eit første byggjesteg på vel 60 leilegheiter. Etter planen skal dei vera innflyttingsklare i juli 2007. Anlegget i strandkanten skal også få badebasseng og volleyballbaner.
Full utbygging kan gje godt over 200 leilegheiter/hytter og ein prislapp på over 800 millionar kroner.

Passar ikkje
I tillegg til dårleg veg og trafikkproblem, argumenterer Ragna Gilborne mot funkis-stilen som no ser ut til å koma. Ho meiner dei planane kommunen har godkjend tidlegare, er i tradisjonell stil.
? Kommunen er med på å marknadsføra farleia like forbi. Det vert argumentert med istandsetjing av naust og bruk av lokal byggjeskikk, viser Gilborne til. Difor kan ho ikkje begripa at kommunen kan opna for bruk av funkis-stil.
?Fleire har sett seg i sving for å undersøkja kva godkjenningar kommunen har gjeve, seier Gilborne. Ho ser heller ikkje bort frå at det vert starta ein ny underskriftsaksjon.