Protesterer mot auka barnetal

– Det vil merkast når avdelinga skal ta mot 14 born mot tolv i dag med fire tilsette som no. Det vil føra til dårlegare kvalitet på det tilbodet borna våre får, seier Kristin Kolstad Skråmestø til Strilen.

Ho er SU-leiar i Juvikstølen barnehage og har sonen Henrik i ei av småbarnsavdelingane der.

Treng tid
Denne avdelinga skal etter planen ta mot to fleire born frå nyttår. Ifølgje økonomiplanen for Lindås kommune skal dei kommunale barnehagane i kommunen ta inn fem fleire born enn no med same bemanning. Av dei fem borna skal tre takast inn i Juvikstølen og to i Haugen barnehage.

– Dei minste borna treng å verta sett av dei vaksne. Mange born kjenner seg utrygge saman med mange andre born, seier Gro Helen Nygard, som har sonen Isak i same avdelinga.

Ho tykkjer det er trasig at kvar gong kommunen skal spara, er det dei minste og dei eldre det går ut over. Ho ønskjer at talet på born i avdelinga skal vera som no, ikkje aukast. Foreldra viser og til at i dag er det fleire eittåringar i barnehagane enn for ti år sidan, og dei minste treng meir tilsyn og hjelp enn dei som er litt større.

Fast bemanning
– Då kommunen tidlegare i år forandra vedtektene for barnehagane, var me mot det. Me ønskjer at kommunen fastset faste rammer for tilhøvet mellom born og tilsette, slik at me ikkje får slike diskusjonar som no kvart år, seier Kolstad Skråmestø.