Protesterte på straumstans med kort varsel

Då Nina Johannessen henta posten til Knarvik Øyelegeklinikk laurdag, låg der brev frå kraftselskapet BKK om at dei skulle stengja straumen der i dag, tysdag, frå klokka 09.00 – 11.00 i samband med arbeid som skal utførast.

– Då vart eg kraftig provosert. Ein kan ikkje senda ut ein slik beskjed med ein dags varsel, seier Johannessen.

Og hadde ikkje ho tilfeldigvis henta posten laurdag, ville dei ikkje visst om det før i går.
Johannessen reknar med at det er andre verksemder i området som har fått liknande beskjed, slik at straumstansen ram­ma fleire.

Avbestilla
– Eg måtte reisa på jobb søndag ettermiddag for å prøva å få tak i pasientar som skulle ha time i det tidsrommet som straumen skulle vera borte. Me kan ikkje ta mot pasientar viss her ikkje er straum, seier Johannessen.

Etter fleire timars innsats var det framleis to pasientar ho ikkje hadde fått tak i.

– Og mange av pasientane vart sinte fordi dei har stått på venteliste lenge for å koma til, seier ho.

Tysdag har dei også leigd inn optikar Helge Stokke, og difor er det ekstra mange pasientar den dagen.
Dermed var det kanskje eit tjuetals pasientar som ville verta ramma.

Augnelege Øystein Mjanger fortel til Strilen at det er opp til eit halvt års ventetid for å koma til der, så ei utsetjing er svært beklageleg.

Kraup til krossen
Johannessen meiner at ein planlagd straumstans må gå an å melda frå om minst to veker på førehand, slik at dei kunne ha tid til å kontakta pasientane og gje dei nye timeavtalar.

Etter at Johannessen hadde gjeve BKK klar beskjed om kor urimeleg straumstansen var, bestemte BKK seg for å utsetja å stansa straumen hos dei. Dermed måtte Johan­nesen i gang med ein ny ringe­runde for å henta inn att pasientane som hadde fått beskjed om at timeavtalen måtte utsetjast.

Johannessen fortel at BKK har opplyst at dei normalt sender ut melding om straumstans eit par veker på førehand, og at dei ved­går at i dette tilfellet er det gjort ein feil.