Prøvetakinga ferdig ved U864

Verksemda Geoconsult driv nye undersøkingar ved vraket av den tyske ubåten. Først skal dei slå fast omfanget av forureining kring vraket av U864, seinare skal dei også prøva å ta opp fleire kvikksølvflasker. Undersøkingar gjort ved prøvetaking har vist at det er eit område med ein radius på 150 meter rundt vraket som er forureina av kvikksølv, melder Kystverket onsdag. Det vert ikkje teke fleire prøvar av sedimenta.
Den tyske ubåten ligg vest for Fedje med ei last på mellom 60 og 70 tonn kvikksølv.
I alt skal det takast kring 150 sedimentprøvar, og desse vert analysert etter kvart om bord på Geoconsult sitt skip «Geoholm».
Det vert nytta fjernstyrt miniubåt (ROV) i arbeidet, og etter kvart skal det også koma på plass utstyr for å henta opp kvikksølvflasker. Så langt har ein observert fleire flasker på botnen, flasker som liknar kvikksølvflaskene som vart henta opp i fjor.
Undersøkingane som vert gjort no i september skal gje Kystverket grunnlag for å anbefala kva ein skal gjera med vraket. Det vart også gjort slike undersøkingar i fjor, men ein fann då ikkje ut nok om til dømes tilstanden til skroget på vraket. For å hindra utslepp av kvikksølv er det aktuelt å heva vraket med flaskene i, berre heva flaskene og ikkje vraket, eller dekka til vraket på botnen.
Uansett kva som skjer med vraket så rår Kystverket til at ein dekker til sedimenta på botnen, for å hindra at forureininga her sprer seg ytterlegare.