Rådmannen seier nei til skytebane

Leiar i Radøy skyttarlag Kornelius Manger seier at eit nei til bane i Haukåsen er eit nei til skyting på Radøy i det heile.
? Denne holmen som me bur på er ikkje så stor. Det er ikkje så mange alternativ til Haukåsen, seier Kornelius Manger.
Etter å ha jobba for ei ny bane i femten år er korkje han eller dei andre styremedlemmene i laget viljuge til å gå på ein ny runde dersom politikarane seier nei til Haukåsen no.
? Spørsmålet politikarane no må ta stilling til, er om det skal vera skyting på Radøy. Får me nei no vert Radøy skyttarlag lagt ned, seier han. Dette er noko styret også har teke opp med medlemmene, og dei støttar dette synet.

? Alltid protestar
? Me har jobba med dette sidan 1991, og kan ikkje gå på fleire rundar no. Uansett kva stad me måtte landa på vil det alltid vera nokon som er i mot, seier Manger.
? Me kjem til å bruka anlegget tre kveldar i veka, to timar kvar kveld, frå april til september. Folk vil nok høyra at det smell, men det er ingen av dei som går på Nøttveitveten som klagar på støy frå skytebana på Manger.
Skytebana laget har på Manger kan nyttast i seksti år til, etter at arealet på slutten av sekstitalet vart oreigna og bandlagt til dette føremålet for 99 år. Men anlegget manglar veg fram til standplass og mellom standplass og anvisargravene, og laget ser seg heller ikkje nytte i å investera der.
? Det vil kosta mykje å rusta opp anlegget med vegar og elektroniske skiver, og det vil ikkje vera framtidsretta. Skal me utvida på Manger må me søka konsesjon, og det vil me heilt sikkert ikkje få, seier skyttarlagsleiaren.

Næranlegg
På Manger ligg det hus inne i støysona, slik at ei utviding vil koma i konflikt med desse. I Haukåsen er det større avstand til dei næraste husa.
? Eit anlegg i Haukåsen vil dessutan sikra området rundt som friluftsområde, for med ei skytebane der vert det ikkje noko utbygging.
Kornelius Manger meiner at anlegga i nabokommunane berre er eit alternativ for jegerar som skal skyta seg inn eit par kveldar før jakta.
? Me får ikkje foreldra til å kjøra borna til Meland, Lindås eller Kjevikdalen for å skyta. Me ser i andre idrettar at det er viktig å ha anlegg i nærområdet, og det er viktig også for oss.
Laget har i dag kring hundre medlemmer, førti av desse er under atten år. Miniatyrskytinga i Radøyhallen er populær, og har hatt over seksti ungdommar innom. I haust har det kome fleire jenter enn tidlegare, og dei er inspirerte av dei gode resultata til Kine Gjerstad Eide (Seim skyttarlag).
? Får me skytebane no, kan me kanskje ha eit slikt talent her også om ti år, seier Kornelius Manger.