Radøy Årets beredskapskommune

Prisen som Årets beredskapskommune i Hordaland vart delt ut av assisterande fylkesmann Rune Fjeld under eit beredskapsseminar på Voss, der ordførar Jon Askeland fekk æra av å ta imot.

Kommunen får prisen på grunnlag av fleire kriterium, etter ei vurdering gjort av Fylkesmannen si beredskapsavdeling.

– Me opplever at Radøy over tid har jobba godt med sam-funnssikkerheit og beredskap. Det har kommunen gjort gjennom ROS- analysar (Risiko og Sikkerheitsanalysar). Kommun­en har følgd desse analysane opp med risikoreduserande tiltak der det har vore nødvendig, seier Arve Meidell.

Ved tildelinga har Fylkesmannen og lagt vekt på at beredskapsarbeidet hjå Radøy er godt forankra både politisk og administrativt.

– Me har og lagt vekt på at Radøy har vore ein føregangskommune i å ta i bruk ny teknologi på fagområdet, seier Meidell.

Det er ros som ord­­føraren set stor pris på.

– Harald Stanghelle har jobba mykje med beredskapen i kommunen og har ein stor del av æra, men eg opplever også at det er noko ein har hatt bra fokus på elles. Det gjeld både i administrasjonen og blant politikarane. Beredskap er eit viktig tema, seier Askeland og legg til at dette er noko ein ikkje legg så mykje merke til i kvardagen.

– Så lenge det ikkje skjer noko spesielt merkar innbyggjarane våre lite til det arbeidet som vert gjort, men når det skjer noko er det viktig at me er godt førebudde slik at me kan takla det som måtte oppstå. Innbyggjarane våre skal kunna stola på at kommunen har eit kriseteam og ein kriseberedskap som fungerer og det er kommunen si oppgåve å syta for at dei kan gjera det og at alt fungerer når det gjeld, seier Askeland i ein kommentar til Strilen.