Radøy/Manger samlar inn jern

? April er ein ryddemånad, og no vonar me på ein skikkeleg dugnad, seier Morgan Taule, leiar i hovudstyret i Radøy/Manger.
? Me kan ta i mot alt frå lastebilar og traktorar, og heilt ned til panner frå private hushald, seier han.
Det einaste skrapjernet innsamlingsaksjonen ikkje omfattar er privatbilar, og kvitevarer som til dømes kjøleskap.

Plan Noreg og idrettslag
Inntektene frå aksjonen skal delast likt mellom Plan Noreg og dei idrettslaga som er med og får inn jernskrotet. Så no vonar Radøy/Manger at radværingane tømmer garasjen og leverer inn skrapet sitt.
? Det er mykje skrot rundt om, og me har alt fått meldt inn fleire traktorar. No vonar me at folk vil hiva jernskrotet i hengaren og koma med det til innsamlingsplassane.
Fotballklubben vil etablera samleplassar fire stader i kommunen. Dette vert hjå entreprenør Jon Olsvoll på Olsvollstranda, på eit område bak Radøy Bil og Motor på Manger, på parkeringsplassen ved Skogen Sletta, og ved båthamna på Nordanger.
? For dei som ikkje kan frakta jernskrotet til ein av desse plassane, er det mogleg å få hjelp til transporten.
Fotballklubben vil etter påske gje ut informasjon om aksjonen. Nokre vil få ein lapp i postkassen, medan ein for bønder og småbedrifter vil ta kontakt direkte.

Landsomfattande
Innsamlinga av skrapmetall i Radøy er ein del av den landsomfattande aksjonen «Gi jernet». Det er rivningsselskapet AF Decom som skal få skrapjernet vidare til smelteverka, medan Plan Noreg og idrettslaga som er med altså skal dela inntektene. For Plan Noreg sin del vonar ein på 35 millionar kroner i inntekter, og dette skal gje reint vatn, helsestasjonar og skular til folk i to av dei fattigaste landa i verda, Malawi og Sudan.
I tillegg til inntekter til gode føremål vil aksjonen også føra til at Radøy vert litt mindre nedskrota.

Store inntekter
Andre stader i landet har denne skrapinnsamlinga gjeve store inntekter for ulike lag. Helgen Idrettslag i Nome fekk utbetalt 128.000 kroner for 541 tonn skrapjern, medan skrapinnsamling på Vinstra gav Ruste bygdehus ein sjekk på 246.000 kroner.
Men i Nordhordland og Gulen er det per i dag 4. april berre i Radøy kommune at eit lag har meldt si interesse for å tena pengar på aksjonen. Dermed er det framleis ope for lag i kommunane Austrheim, Fedje, Gulen, Lindås, Masfjorden, Meland og Modalen å hiva seg rundt for å tena nokre kroner.
For meir informasjon om aksjonen sjå nettsida www.gijernet.no.
Innsamlinga skal vera ferdig i Hordaland i løpet av april.