Radøy/Manger tapte for Brann 2

Radøy/Manger skal likevel vera godt nøgd med innsatsen, og det var langt frå snakk om noko einvegskøyring. Spelet føregjekk faktisk på Brann sin halvdel store deler av kampen. Men ein frisk Trond Fredrik Ludvigsen saman med spelarar som Robbie Winters og Erik Huseklepp sprang sund eit tappert Radøy-forsvar på kontringar i starten, og det stod til slutt 0 - 4 etter berre første halvtimen. Radøy hadde også fleire sjansar og halvsjansar, men det er heller ikkje lett å nå gjennom framme når ein møter forsvarsspelarar som Armann Bjørnsson, Ramiro Corrales og Bjørn Dahl. Kvar av desse spelarane har truleg årsløner som er langt høgare enn Radøy/Manger sitt budsjett. Men heimelaget klarte faktisk å redusera etter dryge halvtimen ved Geir Atle Osa, og nok ein gong rett før pause ved Jarle Sylta. Erik Huseklepp la på til 2 - 5 nokre minutt ut i andre omgang og Robbie Winters fastsette resultatet til 2 - 6 berre sekund før slutt. Vel hundre publikummarar fekk med seg denne kampen, der heimelaget fekk møta spelarar som Radøy/Manger vanlegvis berre møter ein svært sjeldan gong i cupen. Førre gong dei møtte Brann 2 på Sletta, hadde ikkje gjestane ein gong med seg nok drakter til spelarane. Geir Atle Osa vart fortent kåra til heimelaget sin beste spelar.