Radøy/Manger tapte mot Voss

Ein kombinasjon av forsvarsfeil og dårleg utteljing framme, gjorde at resultatet vart som det vart. Heimelaget kom bakpå alt frå start, men klarte å reisa seg utover i omgangen. Før 20 minutt hadde gått leia vossingane 0 - 1. Radøy hadde deretter eit par farlege sjansar, men utan å få utteljing. I ein situasjon med rot og dårleg kommunikasjon i forsvaret, sette Andre Rebnord ballen i eige mål i det 37. minutt. Litt etterpå var det igjen litt ukonsentrert bak hjå radværingane, og ein vossing fekk gå lenge med ballen og sette skotet kontrollert i mål. 0 - 3. 
I andre omgang satsa Radøy/Manger friskt, og fekk straffe i det 50. minutt då Daniel Waage vart felt. Ein ikkje særleg god straffe frå Terje Tangedal vart redda, og det oppstod ein del turmulter då vossingane meinte at Ronny Thomassen var for hissig på returen i duell med keeper. Det var deretter nokre merkelege situasjonar til i Radøy-forsvaret, mellom anna eit tilbakespel som nesten førte til skåring. Radøy hadde også nokre sjansar, eit par av desse veldig farlege, men det meste gjekk over og utanfor i kveld. 0 - 4 målet kom etter nær 60 spelte minutt. Ein vossing fekk stå nokså åleine og sette skotet i nota. Ein omdiskutert situasjon heilt på tampen av kampen, førte til at Andre Rebnord vart utvist. Ein vossing hekta han tilsynelatande med vilje og Rebord takla like etter ein annan spelar stygt bakfrå, noko som verka som ein hevnaksjon. Det var svakt av linjemannen, som stod to meter frå situasjonen, å ikkje dømma frispark til Rebnord. Men det er heller ikkje akseptabelt å hevna seg. Med Rebnord i karantene i minst ein kamp, vert det ikkje lettare for Radøy som så sårt treng poeng i kampane framover. Etter tre kampar ligg radværingane nest sist på tabellen med 0 poeng, det same som Arna Bjørnar og Ny-Krohnborg. Dei to sistnemnde har spelt ein kamp mindre.