Radøy/Manger ute av cupen

Kampen var første runde i kvalifiseringa til NM.
Heimelaget var i føringa 1-0 i kampen på Straume, men Radøy/Manger klarte ei utlikning før pause. I andre omgang sette Øygard så inn vinnarmålet.
Øygard skal denne sesongen spela i 3. divisjon avdeling 15. Radøy/Manger er i avdeling 14.
Dermed vert det ingen reprise på NM-kampen mot Brann i 2005, i fjor spelte radværingane seg nemleg til andre runde i NM og fekk Brann på vitjing til Sletta. Bergensarane vann den kampen 3-1 etter mål av Raymond Kvisvik, Erlend Hanstveit og Bengt Sæternes. Radøy/Manger sitt mål var eit sjølvmål.
I første runde av NM-kvalifiseringa i 2005 vann Radøy/Manger 4-1 heime over Follese, og i andre kvalifiseringsrunde vart det 2-1 borte over Florø. I første ordinære runde av cupen vart andredivisjonslaget Jotun Årdalstangen sendt heim frå Sletta med 2-0 tap i bagasjen. Men så  var det altså slutt når Brann kom utover til Sletta, eit oppgjer ein ikkje får sjå att i år.
Rett nok kjem Brann 2 til Sletta, andrelaget til Mjelde og co. er i same avdeling som Terje Skjelvik sitt mannskap.
Radøy har første seriekamp laurdag 22. april, den kampen går heime mot Bergen Nord klokka 15.00.