Rasar mot hyttereglar

? Me aksepterer at kommunen set grenser for kor store hytter og kaiar skal vera i Masfjorden, men det bør vera grenser som er i samsvar med tida me lever i, seier Geir Haugsvær til Strilen.

Haugsvær er styreleiar i Bjørkeneset hyttefelt på Kvamme. Dei har kome med merknader til arealgrensene som er sette opp i den nye kommuneplanen, som skal vedtakast i vinter.

Å setja ei øvre grense på 100 kvadratmeter for hyttene i kommunen meiner styret er alt for lågt. I merknaden vert det vist til at dei færraste kommunane lenger opererer med øvre grense, men dei som gjer det, ligg på minst 130 kvadrat.

Små kaiar

Men nesten endå verre meiner Haugsvær at arealgrensa på ti kvadratmeter for kaiar er.

? Slik terrenget er mange stader, vil det vera vanskeleg å byggja ein så liten kai. Det kan vera langgrunt, eller terrenget på land gjer at kaien vert større.

? Her må det vera mogeleg å bruka skjøn, meiner Haugsvær.

I merknaden vert det også vist til at kommunar som Kragerø, som har langt større press på standområda enn Masfjorden, har sett ei øvre kaigrense på 15 kvadratmeter.

?  Og viss ein har ein cabincruiser, korleis skal ein kunna leggja til ein så liten kai? spør Haugsvær.

Naturfargar

I føresegnene til den nye kommuneplanen står det og at hyttene skal malast i naturfargar. Det kan ikkje styret i Bjørkeneset hyttefelt sjå føremålet med.

? Kva er naturfargar? spør Geir Haugsvær. I Bjørkeneset er delar av feltet også tilrettelagt for bustadhus, og der gjeld ikkje dei same fargereglane. Det meiner Haugsvær er inkonsekvent.

? Me ønskjer ikkje å vera negative, men meiner at dei grensene som no står, vil skapa unødige vanskar både for hyttefolk og fastbuande. Ein bør heller bruka fornuft og skjøn enn å setja faste grenser, avsluttar Haugsvær.