Rask reaksjon redda Havstad si skøyte

Eigaren av den 60 fots lange, gamle engelske seglskøyta hadde mange å takka i går morgon. Og heldigvis var det ein nabo tett ved, Helge Tangen, som oppdaga at den 60 fot lange skøyta til Havstad tok inn vatn.
? Han ringte ved 07.30-tida, men eg trudde det var noko «reiselivsmas» og svarte ikkje. Men Tangen sende tekstmelding, og den las eg. Då spratt eg opp og kom meg ut til skøyta som var i ferd med ta inn vatn, fortel Gjermund Havstad.

Brannvernet på pletten
Han ringde det lokale brannvernet, og teknisk sjef Øyvind Tolleshaug og hans folk var kjapt på plass. Havstad trur det må ha vore ti mann frå brannvernet som dukka opp.
? Dei kom raskt i gang med pumping, slik at ein såg at skøyta steig i sjøen. Også Fedjefjord reagerte og kalla opp ei redningsskøyte som var ved Fedje. Den var på plass kort etter, og då tok det ikkje lang tid å pumpa ut resten av vatnet, opplyser Havstad.

Nesten til rekkja
Mannskap på MF Fedjefjord slo også alarm ved 07.30-tida, då ferja var på veg inn til kai.
? Me såg at skøyta låg nesten til rekkja i vatn. Ute i fjorden hadde me sett den nye redningsskøyta «Christian Gerhard Jebsen», så me kalla opp den og forklarte at ei skøyte var i ferd med å gå ned, seier kaptein Vidar Sandvik.
Skøyteeigaren er full av takksemd for at den gamle farkosten hans frå 1932 ikkje gjekk til botnar.
? Beredskapen på Fedje fungerte heilt fantastisk godt. Og folka på redningsskøyta leverte også ein flott innsats. Det gjekk så kjapt at eg klarte å nå ferja kl. 09.30! seier Gjermund Havstad.
Sjølv må han berre vedgå at det var slendrian og tankeløysa som gjorde at skøyta nesten sokk.
? Eg pumpa ut vatn frå delar av skøyta tysdag kveld, men sjekka ikkje framme i salongen. Der har det tydelegvis vore mykje vatn. Og når vatnet kjem over eit visst nivå, renn det fort inn, seier Havstad. Dermed får ein tru at han har fått seg ei klar påminning om å lensa skøyta si meir regelmessig enn det han har gjort i det siste.