Raske rytmar på dansekurs

Fredag
fekk 25 jenter på Knarvik barneskule testa både koordinasjon og konsentrasjon då Irmelin Gripsgård inviterte til dansekurs.

- Det er kjempegøy! ropar dei i kor.

- Ein, to, tre, klapp! Fire, fem, seks, snu! instruerer Irmelin.

Dei fleste jentene har den første dansen inne i ein fart.

- Me var på prøvetime førre fredag, og i dag er det berre nokre få nye, seier Kristin Aase (9).

Dei nye hang seg raskt på, og etter litt teljing av steg og terping var det tid for å læra enda ein ny dans. Ei av dei som ikkje var på prøvetimen var Regine Solberg (11).

- Ho er kjempeflink å læra frå seg, ho går ikkje vidare før alle kan det, det er kjempeflott, seier Regine.

Ung og lovande
Kurset vert leia av Irmelin Gripsgård, som er 15 år og går siste året på Meland ungdomsskule. Dei tre siste timane på fredagar har elevane valfag, og i desse timane har dei høve til å velja sjølv kva dei vil gjera. - Det skal vera noko som me brukar mykje tid på elles, og då fall valet naturleg på dans for meg. Eg går på dans sjølv måndagar, tysdagar har eg og ei venninne dansekurs for elevar på Grasdal og fredagar har eg no starta kurs her. I tillegg dansar eg mykje heime, seier Gripsgård.

Ho har vore med i den lokale ungdomsmeisterskapen og fått høvesvis første- og andreplass dei to siste åra. - I meisterskapen i Bergen kom eg blant dei seks beste, seier ho stolt.

Populær lærar
Etter 20 minuttar er jentene slitne, og treng ein drikkepause. Men Irmelin får ikkje pause, for dei danseglade jentene stimlar seg rundt ho, nyfikne og pratesjuke. - Eg tykkjer du er veldig kul, seier Ailin Bergetun Kvalheim (10). - Kan ikkje du visa den dansen som du gjorde sist gong? Kan du fleire dansar? Eg vil dansa til "What?s in it for me". Elevane er tydeleg fascinert av den flinke læraren, og gledar seg allereie til neste kurs, som er om ei veke. Dette er nemleg den første av fem fredagar kurset går, og kvar gong vil deltakarane læra nye dansar. - Men dersom kurset vert så populært som det ser ut til, kjem eg nok til å halda fram med fleire kurs seinare, seier Irmelin.