Rebnord såg raudt

Radøy/Manger stilte med fleire tenåringar frå start, då laget for tida er plaga med ein del skadar. Det viste seg å ikkje halda mot store og meir rutinerte vossingar.

Rebnord utvist
På tampen av kampen vart og forsvarskjempa Andre Rebnord utvist. Han vart tydeleg hekta, tilsynelatande med vilje, av ein vossing. Då dommaren ikkje reagerte svara Rebnord med ein stygg takling av ein annan spelar bakfrå. Radøyspelaren fekk dermed raudt kort. Det var svakt av linjemannen og dommaren å ikkje reagera på den første hektinga, men slike hevnaksjonar er heller ikkje akseptable. Resultatet vert at Radøy må klara seg utan Rebnord ein kamp eller tre.

Dårleg utteljing
Ein kombinasjon av forsvarsfeil og dårleg utteljing framme, gjorde at resultatet vart som det vart fredag. Heimelaget kom bakpå alt frå start, men klarte å reisa seg utover i omgangen. Vossingane tok leiinga tidleg i omgangen og det kunne fort ha vorte fleire baklengs dei første 20 minuttane. Radøy hadde og eit par farlege sjansar i omgangen, men utan å få utteljing. I ein situasjon med rot og dårleg kommunikasjon i forsvaret, sette Andre Rebnord ballen i eige mål i det 37. minutt. 0 ? 2. Rett før pause var det igjen ukonsentrert bak hjå radværingane. Angrepet starta med feil og avventande forsvarsspel på høgresida. Ein vossing fekk gå lenge, ta med seg ballen inn i feltet og setja skotet kontrollert i mål. 0 - 3.

Brende straffe
I byrjinga av andre omgang satsa Radøy/Manger friskt, og fekk straffe i det 50. minutt då Daniel Waage vart felt. Ein ikkje særleg god straffe frå Terje Tangedal vart redda, og det oppstod ein del turmultar då vossingane meinte at Ronny Thomassen var for hissig på returen i duell med keeper. Det var deretter nokre merkelege situasjonar til i Radøy-forsvaret, mellom anna eit merkeleg tilbakespel som nesten førte til skåring. Radøy hadde også nokre sjansar, eit par av desse veldig store, men det meste gjekk over og utanfor på fredag. Eit flott innlegg frå Krister Smith klarte Raymond Kviste å beina over frå to meters hald, men han var veldig pressa av vossingane i den situasjonen. 0 - 4 målet kom etter nær 60 spelte minutt. Ein vossing fekk stå nokså åleine og sette skotet i nota. Etter tre kampar ligg radværingane tredje sist på tabellen med 0 poeng, det same som Arna Bjørnar og Ny-Krohnborg. Arna Bjørnar har spelt berre to kampar, og har høve til å passera radværingane på tabellen med poeng i neste kamp.