Redda nabolaget frå brann

? Først såg eg berre litt røyk, men så fekk eg auga på flammane og endå meir røyk, seier syttenåringen, som akkurat kom ut av dusjen då han oppdaga at det brann på ein haug like nedom huset.
Det første han gjorde var å springa ned til onkelen, som er nærmaste nabo og akkurat hadde kome heim. Og medan somme sprang for å henta hageslangar, ringte kona hans etter hjelp og Kim André og nokre andre ungdomar begynte å sløkkja med kvistar.
? Akkurat då me hadde fått tak i nok koplingar til å koma nærmt nok brannen, kom brannvernet, seier onkel Idar Nestaas.
? Det eg først tenkte på, var alle dei gamle bygningane me har her, som Holmestova og Sveitserhuset, som berre ligg hundre meter frå der det brann. Men eg var også redd for budstadhusa som ligg ganske tett akkurat her, seier Kim André.
Kva som kunne skjedd om han ikkje var heime, eller om vinden for eksempel hadde vore kraftigare eller blåst ein annan veg, tør han ikkje tenkja på.
? Det var faktisk ei ganske ekkel oppleving sjølv om det ikkje var store flekken som brann, seier han.
Kva som har forårsaka brannen har verken han eller brannvernet peiling på, men det alle er glade for er at Kim André var heime.
? Hadde det tatt lenger tid før brannen hadde blitt oppdaga, kunne han fått eit heilt anna omfang, seier Nils Medaas i Lindås og Meland brannvern.