Rekk ikkje over heile jobben som skuleleiar

Kvamme stadfestar eit av punkta i brevet frå forbundet om at einingsleiarane har det svært travelt. Brevet er stila til ordførar og kommunestyre.
? Det er snakk om ei knallhard prioritering av kva eg skal gjera. Situasjonen med at ein ikkje rekk over alle oppgåvene, har eg orientert rådmannen om, seier Kvamme.
Kvamme er tilsett som einingsleiar for skulane Seim, Skodvin og Festo. Når han uttaler seg, presiserer han også at situasjonen ikkje er avklart:  Det mannskapet den nye organiseringa føreset, ikkje er på plass så langt.
? Så vidt eg veit, arbeider rådmannen med ei avklaring, ei sak som kommunestyret etter det eg veit vert orientert om 15. mars.

? Seier seg sjølv
I slutten av januar avgjorde som kjent Fylkesmannen at organiseringa for Seim/Skodvin/Festo og Leiknes/Eikanger/Kløvheim/Myking var ulovleg.
Fylkesmannen krev at kvar av skulane må ha ein person med rektor-mynde.
? Inntil vidare har rektorane ved Festo og Seim skular fått forlenga sine mandat, og det fungerer greitt. Men eg kan ikkje vera både einingsleiar for tre skular og det som var kalla koordinator for Skodvin. Det seier seg sjølv, seier Kvamme, tidlegare rektor ved Skodvin skule.
Han seier også at når han har sagt ja til stilling som einingsleiar, er han innstillt på å gjera den jobben kommunen legg i dette.

Mykje uløyst
Undersøkinga Utdanningsforbundet har gjort, vart utført over to veker i januar. 10 skular sende inn svar. I praksis viser det seg, i følge undersøkinga, at einingsleiarkontora står ubemanna i lengre periodar. Det skuldast at det dukkar opp uføresett ting og møte.
«Oppgåver som tidlegare vart løyst i administrasjonen, siv ned til personalet», heiter det i oppsummeringa. Det kom inn om lag 50 hendingar der det hadde vore trong for at rektor var til stades, meiner forbundet dei har dekning for å slå fast.

Ein skule, ein rektor
Utdanningsforbundet viser til at Lindås til no ikkje har vore friteken for lovkravet om rektor på kvar skule. I brevet tek ein også for seg tolking av lovkravet om å halda seg «fortruleg med» den daglege drifta av skulane.
«Kan rektorane vera synlege i skulemiljøet når dei har langt mindre tid dei kan vera til stades ved dei einskilde skulane», spør utdanningsforbundet.
Forbundet deler ikkje Fylkesmannen sitt ja til felles rektorar ved barne- og ungdomsskulane i Knarvik, på Lindås og Ostereidet. Både der og ved alle småskulane vil forbundet ha ein rektor slik det var før.